Songjinmao traffic-ni niamrang ja·rikja

SHILLONG: Traffic rule-ko pe·giparangni kosako Shillong traffic police-ba ja·ku de·engama? Oe Shillong police ru·utgija sal somaio jemangan gampretpretanirangko namnika uamangna rakgipa u·iatani kattarangko watatna lakni lak silence-rangko nosto ka·e galaha indiba traffic police songjinmao gari sikket-changkate dakako aro chu ringe gari salgiparangko chek ka·anirang chu·ongengama.
Chu ringe gari salgiparangko chekna ka·na jensalo Shillong traffic police ramao alcometer-rangchi ramao chek ka·anirangko nika aro police ua device-rang dongama dongja uko ma·sija jeba cholchi raken chek ka·enga.
Uamang gari salseksekanirangko aro chu ringe gari salgiparangni kosako chekking ka·e police namen nirokenga indiba jensalo a·sel ong·a ua somaiona agre adita somainasa salo indakgipa raken chekking ka·anirangko nikenga aro police niam pe·giparangni kosako ja·ku de·na sin·jetako man·skaa.
Shillong-o jemangan ontisaba sengna sikgija salsekseke katgipa motor-bike aro chu ringe salgiparangoni ramao naljokna dal·begipa ra·biani ong·a iako sakantian ma·sia.
Shillong Traffic Police, Assam police-oniko chotchanggija koborrangko ra·na man·a jeon Guwahati ISBT-o a·dok ning·o bas gariko salgipa sakanti gari neng·takram biaponi re·chakatna skang gariko salgipa chu ringama ringja uko alcometer-chi chek ka·a aro chek ka·na skang station-on dongaia.
Maibakai ISBT Shillong-o ba Iewduh-o mitam parking lot-rangoba jeon chel·achi re·gipa bas garirangko indakgipa chek ka·anirangko dakjaenga. Mangmang traffic police-san ISBT Shillong-ni a·palo chek ka·aniko nikenga jeon traffic-ni niamrangko ja·rikna nanga aro ISBT-oni re·chakatna skang dal·dalgipa bas garirang traffic-ni niamrangko ja·rikna nanggipa ong·a.
Ru·utgija salo bilsi gitalko maniani salmitingo chu ringe gari salgiparangko Assam police-ni raken chekking ka·anirangko bang·a social media-o watataha. Maibakai indakgipa ja·ku de·anirangko Shillong-oba namen nikna gita man·aha.
Uamangoni bang·bataan pilak niamrangko pe·genchimoba taxi salgiparangna traffic police alamala niamko ra·gataia.
Mitam local taxi salgiparang sak bongani biapo sak dok passenger-rangko gatenga aro uamang traffic police-chi rim·a man·a maming kengijaan paraken salenga aroba traffic police-ko rama bibrarango dona indiba uamang uamangko rim·ja. Shillong-o taxi salgiparang bang·arangan chu ringe salenga.
Attamo pilak traffic-ni niamrangko wataia aro police-rangni mikkangon sak dok gate mesokaia.