SHILLONG: India a·songni President Droupadi Murmu, re·baenggipa January-ni 15 aro 16 tarikrango, skanggipa changna Meghalaya a·dokona re·baengani gimin Shillong aro Tura songjinmarango sipai dolrangni chel·chakanirangko bariataha.
Meghalaya a·dokona re·baanio a·songni President Droupadi Murmu, skanggipa January-ni 15 tariko Tura-o ong·atenggipa Meghalaya Games-ko do·ga oe on·anggen aro salgipin, chong·motan January-ni 16 tariko, a·dokni skotong Shillong songjinmaona re·ange, Shillong Ropeway project-na pangchakaniko songe on·angskagen.
A·songni President re·baengani gimin Tura aro Shillong songjinma damgnion chel·chakanirangko bariatenga ine talataniko on·angengon, iana a·dok sorkari, dolsku paramilitary sipai dolrangko ma·mongoniko bi·ataha ine a·dokni police officer saksa parakataha.
Official-rangni u·iatani gitade, Tura aro Shillong songjinmao a·songni President-ko sokachaksona gita dingtang dingtang tom·anirangkoba ong·ataha aro ia biap damgnion official-rang kamrangko ka·soengaha.
Tura-o ong·atenggipa Meghalaya Games-ko January 15 tarikoni a·bachengate January 20 tariko matchotatna siengachim aro ia chang Meghalaya Games-o gimik ming 22 kal·susaanirango gimik sak 3000-na baten a·dokni dingtang dingtang biaprangoni kal·susagiparang bakko ra·na siengachim.
Ia Meghalaya Games-ko ong·atna gita a·dok sorkari gong kror 23-na baten tangka paisarangko chamsoaha.
