SHILLONG: Re·anggipa Sonibar salo, East Jaintia Hills a·jao donggipa song damsani mande saksako Bangladesh a·songoni napsrukbagipa manderang so·ote galaha indiba saksade joke katna man·aha.
Koborko on·ani gitade, sianggipa mandeara Umkiang songoni bilsi 50 ong·gipa Chiang Dkhar ong·achim aro ia a·sel ong·anio, Lumsoski songni Rahul Pohtam minggipa mandede kate jokna man·aha.
Ia manderangko, Bangladesh a·songni dolsa manderang, Sonibar attamchibara, Umkiang-oni adita kilometre-rang donggipa Lumsoski songni gue bagano kragija dake chadrapaha aro chadrapako man·e uamangoni saksade siangna gita nangaha.
Ia a·sel ong·ani ja·man police-rang, Umkiang songni manderang baksa, Chiang Dkhar-ni manggisiko ra·na gita ua biapona re·angaha.
