Catchment area-rangko ‘geotag’ ka·gen
SHILLONG: A·dokni pilak chiring chibisik aro chi man·ani cholrangko ripinge rakkina gita a·dok sorkari, a·dokni pilak catchment area ba chi chimongani cholrangko geotag ka·na tik ka·angaha.
A·dokni mongsonggipa chi chimongchakram biaprango manderang songdong a·chatokanichi aro bagan barirangko dake cha·enganichi nangchakeanirangko man·engani gimin iandakgipa biaprangko sorkari, geotag ka·na tik ka·angaha.
“Chi man·ani cholrangko maikai chel·chakna man·gen, uarangni bidingo am·sandina gita chinga pilak catchment area-rangko geotag ka·enga,” ine Sombar salo, a·dokni PHE Minister Marcuise N Marak aganaha.
Iani bidingo apsan chanchirime ja·kurangko de·na gita PHE department, bakan gipin department-rang baksa tom·e chanchirimanggen ineba Marak aganaha.
Chi chimongani cholrangko chel·chakna nangengani gimin janapatengon, iani bidingo a·dokni Chief Minister dingtangmancha water expert committee-ko songaha aro ia committee bakan Shillong-o tom·aniko ong·atna sienga ine PHE Minister parakataha.
“Ia committee-o Delhi-oniba u·i-ma·sigipa manderang donga aro uamangba salsana ong·atenggipa tom·anio apsan bakko ra·anggen,” ine ua aganaha.
Marak-ni aganani gitade, ia tom·anio Forest & Environment, Water Resources, Soil & Water Conservation aro uandakgipa dingtang dingtang department-ni officer-rangba bak ra·anggen.
Chi chimongchakram biaprango a·ningni ma·manti kamrangko ka·e cha·enggipa manderangna dingtang janggi tangani cholrangko on·na nangengani giminba Marak janapataha.
“Department-ni gita chinga iani bidingo am·sandianirangko dakna a·bachengaha aro kamrang matchotahaon, iandakgipa biaprango a·ningni ma·manti kamrangko ka·e cha·enggipa manderangna dingtang janggi tangani cholrangko on·ani gimin anga Chief Minister baksa agangrikmanaha,” ine PHE Minister aganaha.
Umkhen chibisiko ro·ongrangko bikotengani a·sel Madanriting aro Shillong-ni gipin biaprangona ra·angenggipa chirangna nangchakeaniko man·engani gimin adita salrangna skangsan a·dokni Water Resources Minister Comingone Ymbon, ia biapona re·ange nieaha ineba Marak parakataha.
“Iani ja·man, chibisikrangko chel·chakna gita chinga songrangona deputy commissioner-ni gadangoniko official-rangko watatenba, songni manderang baksa agangrikatna tik ka·aha. A·arang manderangni ong·genchimoba, forest act aro catchment protection act-rangba dongskaa. Manderang chibisikrangko chel·chakja ong·ode sorkari ja·ku de·na nangao ga·akskagen,” ine PHE Minister aganaha.
Payment for Eco-system Services (PES) scheme-ni gimin talataniko on·angskaengon, PES-ni tangka paisarangchi sorkari, manderangni a·arangko breenga ong·ja indiba buring bolgrimrangko nisigija dingtang janggi tangani cholrangko ra·china cholko on·enggipasa ong·a ine Marak parakataha.