SHILLONG: Hynniewtrep National Liberation Council (HNLC)-ko dilenggipa manderangni kosako ka·gipa gitcham case-rangko kema ka·genchimosa ma·mong aro a·dok sorkari baksa tom·tomanina agangrikaniko dakangkuna man·gen ine Sombar salo, HNLC bobil dolni ku·baltitimgipa aro Hynniewtrep National Youth Front (HNYF)-ni president Sadon K Blah parakataha.
Tom·tomaniona re·bapilna sorkari baksa agangrikaniko ra·pilna gita adita salrangna skangsan, champengatako man·gipa HNLC bobil dol, ma·mong sorkarina sedoatahachim.
Sorkari baksa agangrikaniko ra·pilna gita segimin chittiko Sombar salo, sorkarini ku·baltitimgipa PS Dkhar-na on·eani ja·man kobor ra·timgipa manderang baksa agangrikengon, “HNLC-ni dilgiparang aro membor-rangni kosako bangki dongenggipa gitcham case-rangko sorkari kema watgenchimode HNLC-ni dilgiparang, sorkari baksa agangrikaniko dakangkunaba gnang. Indiba sorkari, ainko ja·rikani giminsan chanchiaia ong·ode HNLC bobil dolni sorkari baksa agangrikani ianon bon·aignok,” ine Blah parakataha.
Sorkari nangnikgenchimode HNLC-ni case-rangko kema ka·e nama bewalo agangrikaniko matchotatna man·gen ine janapatengon, “Ia pilakan da·o sorkarini jakosa ong·aiaha,” ine Blah parakataha.
Blah-ni aganani gitade, HNLC bobil dolni manderangko tom·tomaona rimbapilna gitade, sorkari ainkosan ja·rikaigija uamangna namgipa cholrangko on·naba nangengachim.
“HNLC-ni dilgiparangko sorkari agangrikna okamateba, ainni gitasa re·na nanggen ine aganaia ong·ode uan namgipa chol ong·jaenga ine anga an·tangde chanchia. A·gilsako pilak dakgrik dinggrikanirangkon ainko ja·rikaianichide namatna man·jaha indiba ma·sichakgrikani gnang agangrikanichisa namatna man·aha,” ine HNLC bobil dolni ku·baltitimgipa aganaha.
HNLC-ko dilgipa manderangni kosako ka·gipa case-rangni gimin janapatskaengon, “HNLC-ni kosako segatgipa case-rangara ka·namgiparang ong·ja ine Ministry of Home Affairs-ni Advisor (NE) AK Mishra-ni aganako anga gisik ra·enga. HNLC-ni kosako segatgipa case-rangara ka·namgijagipa case-rang ong·ja ong·ode uamangni case-rangko sorkari kema ka·na nanga,” ine Blah aganaha.
HNLC bobil dolni gisepo maming bak dakani dongja aro uamang jeko dakna manchioba pilakan apsansa manchironga ineba ua parakataha.
HNLC bobil dol baksa agangrikaniko matchotatna man·jaengani gimin MDA sorkariko matnangatskaengon, “HNLC-ni case-rangko ra·pilna, HNLC-ni manderangko kema watna aro pattoko donako man·enggipa manderangko watpilna gita sorkario bil donga ine chinga bebera·a maina tom·tomaniko man·na gitade sorkari, ainni gita re·gija, ma·sichakgrikani gnangsa kamko ka·na nanggen,” ine HNLC bobil dolni ku·baltitimgipa parakataha.
