SHILLONG: Hynniewtrep National Liberation Council (HNLC) bobil dol baksa agangrikani kamrangko a·dokni Home Minister aro Deputy Chief Minister Prestone Tynsong-sa jako ra·engani gimin HNLC bobil dol baksa agangrikaniko Home Minister re·bapiljokosa niangna gita man·gen ine Sombar salo, a·dokni Cabinet Minister aro NPP-ni dilgipa Ampareen Lyngdoh parakataha.
HNLC bobil dolni dabianirangko aro mongsongbate uamangni bangki dongkuenggipa case-rangko kema ka·china dabianiko sorkari chu·sokate on·jaengani gimin sorkari baksa agangrikaniko HNLC bobil dol ra·pilahachim ine nikna man·a.
Iani bidingo kobor ra·timgiparangna talataniko on·angengon, da·o dipet a·dokni Home Minister aro Deputy Chief Minister Prestone Tynsong, be·enni gita an·senggijanirangko man·engani gimin HNLC bobil dol baksa agangrikani kamrangko niatna man·kujaenga aro uni an·sengpile re·bapilanikosa uamang nichaksoengachim ine Lyngdoh parakataha.
Indake ong·genchimoba, HNLC bobil dol baksa tom·tomanina agangrikaniko matchotatchina gita NPP-de sorkariko nangnikengachim ine Lyngdoh aganaha.
MDA sorkarini bak ong·e NPP-de, HNLC bobil dol baksa agangrikaniko chu·sokatna gita on·kange kam ka·engkua ineba ua aganaha.
“A·doko pangkamgipa tom·tomaniko ra·bana gitasa chinga HNLC bobil dol aro sorkarini gisepo ma·sichakgrikani dongchina nangnikenga,” ine Lyngdoh aganaha.