SHILLONG: Assam aro Meghalaya a·dokni simarango meligrikna man·jaenggipa biaprangko namatna gita da·o a·dok damgnini sorkarirang gnigipa changna agangrikengon, Langpih jolo ga·akgipa pilak dam 53 songrangkon Meghalaya a·doko ra·rikna gita krenge kamko ka·china Hill State People’s Democratic Party (HSPDP), a·dok sorkariko didiataha.
HSPDP-ni president aro jolni gitcham MLA KP Pangniang-ni parakatani gitade, 2011 bilsion Meghalaya sorkari, ia jolo donggipa dam 53 songrangko Assam sorkarina see on·manahachim.
“Ia dam 53 songrang da·oba dongkuengama uko an·ching name am·sandie nina nanggen indiba ia pilak songrangkon an·ching Meghalaya a·dok ning·o man·rikna gita krengna nanggen,” ine Pangniang, jean West Khasi Hills regional committee-ni membor-ba ong·engachim, kobor ra·timgiparangna aganaha.
Assam-ni regional committee baksa uamang apsan ia biaprangko niehaon, ia songrangni gimin talbate ma·sina man·gen ineba Pangniang aganaha.
Langpih jolo ning·o ga·akgipa dam 61 songrangko Meghalaya a·dok ning·o kangaha ine adita salrangna skangsan West Khasi Hills regional committee-ni chairman aro a·dokni Cabinet Minister Paul Lyngdoh parakatskaahachim.
West Khasi Hills a·jani Langpih jolo donggipa songrangko apsan re·ange nieani ja·man Assam aro Meghalaya a·dokni regional committee-rang, report-rangko on·na siengachim.
Langpih jol ning·o donggipa dam 61 songrango mongsongbate Khasi aro Garorang songdong a·chabattokengachim aro badiaba badiaba nokdangrangde bringimin jat aro Nepalirangba ong·skaachim.