TURA: January 15 tarikoni 20 tarikona Tura-o sokachakenggipa Meghalaya Games-na Tura jilla pilakon tarisamsotokengani gimin aro Tura jillani ning·o donggipa pilak gittimrangon rongtalatani aro nitoatanirangko daksamsotokengani gimin January-ni 13 aro 20 tarikrango, Sonibar changgnina Tura-ni Chandmari-o me·su anti dakenggipako chipgen ine Tura Municipal Board (TMB)-oni u·iataha.
Ia Meghalaya Games-ko Tura-o sokachakaniko name chu·sokatna man·na gita January-ni 13 aro January-ni 20 tarikode Chandmari-ona me·su samjak aro uandakgipa bosturangko ra·bae paljachina gitaba TMB-ni gita pilak bading chiwalgiparangkon mol·molataha.10
