TURA: Tura Civil Hospital-o 80 bedded hospital-ko tariengani gimin ia hospital-ni COVID-19 ward-ona dakanggipa ramako chipatchengenga ine West Garo Hills a·jani Deputy Commissioner u·iataha.
Deputy Commissioner-ni u·iatani gitade, Tura Civil Hospital-ni 80 bedded hospital-ko rikengmiting somoio, sambao donggipa manderangna maming kenchakna nanganirang dongjana gita COVID-19 ward-ona dakanggipa ramako chipatchengaha.
80 bedded hospital-ko rika matchotkujana kingking ia ramako bilsi gimik chipatchenggen ine u·iatengon, ia rama gita gari gorarangni re·ruraanirangkosan champengatenga indiba ja·achi re·ruraenggipa manderangde ia rama gita re·na man·aigen ine DC parakataha.
Ia ramako chipatengmiting somoio bakrimaniko on·china gita jolo songdongenggipa manderangko aro rama gita re·ruraenggiparangko didiatengon, manderangni namgnina ia ramako ta·raken watpiltaina jotton ka·gen ine Deputy Commissioner u·iataha.
