TURA: Tura-o gital rikgipa Raj Bhavan (Governor’s House)-ko da·al Sukrobar salo, Meghalaya a·dokni Governor Phagu Chauhan, nokdonggae on·anggnok.
Ia gital Raj Bhavan-ko nokdonggae on·anganio, a·dokni Chief Minister Conrad K Sangma, Meghalaya Assembly-ni Speaker Thomas A Sangma, Tura-ni Lok Sabha MP Agatha K Sangma aro gipin dilgiparangba dongpae bak ra·anggen.
Re·baenggipa January-ni 15 tariko, a·songni President Droupadi Murmu, Tura-ona re·baengani gimin ia Raj Bhavan-on walsade waltuangna siengachim.
Tura jillani Danakgre-o Governor’s House-ko rikna gita 2010 bilsini August jaon pangchakaniko songahachim indiba dingtang dingtang a·selrangchi kamrang ja·manchakatako man·e da·osa ia nokko nokdonggaengachim ine nikna man·a.
Ia Governor’s House-ko acre 28.45 ong·gipa a·ao rikaha aro ia biapo Governor-ni office baksana secretariat, conference hall, VVIP aro VIP guest house-rangkoba rikchapahachim.
