TURA: West Garo Hills a·jani Kalchengpara jolrango niam gri teer counter-rangko kulie palenga ine FKJGP aro ASWA Selsella unit parakatenba, iani bidingo ta·raken ja·kurangko de·china West Garo Hills a·jani Deputy Commissioner-na sedoataha.
“Kalchengpara songo licence gri teer counter-rangko kulie paltokenga ine chinga bang·en badi ka·anirangko man·soaha. A·songna aro jatna kamko ka·gipa dol ong·e chinga niam retirangko ja·rikna nanga ine bebera·a aro songsalni namgnina iandake niam gri chalaienggipa teer counter-rangko chipatchina chinga didienga,” ine FKJGP Selsella circle aro ASWA Selsella unit parakataha.
Kalchengpara songo niam gri palenggipa teer counter-rangko am·sandienba nanga gita ja·kurangko de·china Deputy Commissioner-ko didiatengon, niam gri teer palenggiparangni kosako ja·kuko de·anichi niam retirangko rakkian baksana manderangko iandake niam gri joa kal·atgiparangoniko chel·chakna man·gen ine dolgni NGO-rang parakataha.