Tura: India-ni President Droupadi Murmu January 15 tariko Meghalaya Games ong·atna am·enggipaona Tura songjinmao wenba-enganio nipilaniko dakaha, Shillong ba Guwahati-ona songreanggipa manderang NH-51 ramako gari salangjachina jekon VVUP-rangni gita ia ramako jakkalanggen, ine West Garo Hills (WGH) police ku·pattianiko on·angaha.
“Ia u·iataniko mande jinmanan u·iatenga jeon India-ni President Droupadi Murmu January 15 tariko Tura-ona wenbaenga. VVIP-na rama wataniko nipilanio, Tura songjinmani dingtang dingtang biaprango je rama gitan VVIP re·anggen ua ramarango gari rama re·anirango adita neng·-nikanirang sokbana donga. Nangchongmotana agre Tura songjinmaona song-rebaanirangko gel-china manderangko mol·mola-tenga, ine SP, Abraham T Sangma u·iataha.
January 15 tariko Tura songjinmani junction gimiko VVIP sokbana kontasa skang salpaksao garirangko dondipatgen. VVIP sokbaa sokbakuja kingking konta 24-na HMV aro truck garirang Tura songjinmaona napbana man·jawa ine ua agan-dapangaha.
January 15 aro 16 tariko Guwahati aro Shillong-ona South West Garo Hills-oni Assam-ni Mankachar-oni songrebagiparang Tura ramako gele AMPT rama gita re·angskachina ku·-pattie mol·molataniko on·dapangaha. South Garo Hills Baghmara-oni Guwahati aro Shillong-ona ua apsan salo songreangna nang-chongmotgiparang Siju, Rongjeng rama gita songreangchina mol·-molataha. President-na ramarangko tarisamsoanio January 15 tarik pringni somoioni salpakona rama rikamrango garirangko donjachina u·iataha. Emergency service-rangna ramako wat-gen. Ia traffic-rangko tari-samsoanganio chu·soka-niko man·a officer-rang aro traffic sipai dol ong·kange tariangenga ine bon·kame u·iataha. Traffic-ni bidingo talbate ma·siangna ba sing·san-diangna 8837423053 aro 9089199054-o Police Control Room (PCR)-na ka·atna man·anggen.
