BAGHMARA: Bilsianti ong·atrongenggipa Tyisam Festival-ko ia bilsioba re·baenggipa January-ni 24 aro 25 tarikrango Baghmara-ni Simsang chibima rikamo ong·attaina gita sienga.
South Garo Hills a·jao Winter Festival-ko bilsiantian Simsang chibima rikamo ong·atrongengani gimin ia manianiko Atong ku·sikchi Tyisam ine mingenba, bilsiantian dingtang dingtang program-rangko ong·ate manirongenga aro uandaken ia changoba ia Tyisam Festival-o jatni kal·susaanirang, chio kal·susaanirang, jatni daka rikani, dingtang dingtang jatrangni chrok mesaani, git ring·ani aro uandakgipa dingtang dingtang program-rangko ong·atna gita manchie donsoenga ine u·iataha.
Ia bilsini Tyisam festival-o ong·atna sienggipa mongsonggipa program-ranga, joltangni cha·ani ringanirang, jatni kal·susaanirang, chroksusaani, git ring·susaani, Beach volleyball, Flower show aro uandakgiparangan ong·enga.
Ia Tyisam festival-ko January-ni 25 tariko dingtangmancha Rock Concert-ko ong·atanichi matchotatgen aro ia concert-o gitrangko ring·e mesokangna sienggipa dolrangara, Rough Road, Nokpante, Ahowee, Enosh aro gipinrang ong·enga.
