TURA: Selsella-o donggipa State Bank of India (SBI) branch office-ko Budbar changantian chipe donengani a·sel bank-ni kamrangko ka·na nangenggipa manderang aro mongsongbate tangka paisarangko okna nangenggipa manderang neng·nikanirangko chagrongna nangtokenga ine Selsella-ni A·chik Students Welfare Association (ASWA) aro Federation of Khasi, Jaintia & Garo People (FKJGP) dolrang, West Garo Hills a·jani Deputy Commissioner-na badi ka·e sedoataha.
Iani bidingo West Garo Hills a·jani Deputy Commissioner-na badi ka·doatengon, Selsella bazar-ko Bristibar salosa cha·ronga indiba Budbar salo SBI branch office-ko chipe donrongengani gimin jolni manderang tangka paisarangko okna man·jae, Bristibar salo bazaar anti cha·na neng·nikanirangko chagrongna nangrongenga ine ASWA aro FKJGP dolrang parakataha.
“Budbar changantian SBI Selsella branch office-ko chipe donrongengani a·sel Selsella jolni manderang, tangka paisarangko okna aro nanga kamrangko ka·na man·jaenga aro Bristibar salo cha·rongenggipa Selsella bazar-koba cha·na man·jaenga,” ine dolgni NGO-rang, iani bidingo bank official-rang baksa agangrikatchina Deputy Commissioner-ko didiataha.
SBI Selsella branch-o passbook update ka·ani machine aro automated teller machine (ATM) dongjani a·sel jolni manderang neng·nikanirangko chagrongna nangtokenga ineba ASWA aro FKJGP Selsella circle parakataha.
