TURA: Re·anggipa 2023 bilsio, South West Garo Hills a·jani District Selection Committee (DSC)-ni gita Lower Division Assistant (LDA)-ni kamna manderangko seokanio Assam-ni candidate saksakoba seokaha ine matnanganirangko man·ani bidingo A·chik Holistic Awakening Movement (AHAM) South Western Zone Ampati-ni gita, DSC aro South West Garo Hills a·jani Electoral Registration Office-o RTI ka·ahachim indiba RTI-na aganchakanio chu·ongnikaniko man·jaha ine AHAM Western Zone Ampati-ni general secretary Wester Sangma parakataha.
Sangma-ni parakatani gitade, LDA-ni kamna badita sak candidate-rang viva voce (personal interview)-ko ra·aha, viva voce-o candidate sakprakni man·gipa mark-rangko, typing speed test aro porikka seani result sheet (photocopy), aro 2018 bilsio on·gipa advertisement-na dorgasto galgipa candidate-rangni permanent residential proof-rangko mesokchina gita AHAM-ni RTI-o public information officer (PIO)-na u·iatahachim.
“Chingni kobor man·soani gitade, viva voce-ni result-rangko parakon seoka man·gipa candidate saksade Assam-nisa ong·achim indiba 2018 bilsio on·gipa advertisement-ode gipin a·dokni candidate-rang ia kamna dorgasto galna man·jachim aro Meghalaya a·dokni residential proof dongna nangachim. Ua somoio ia candidate, an·tangni election ID card-ko Assam-oniko Meghalaya-ona apjitbakujachim aro 2023 bilsiosa ua gital daka election ID card-na SWGH a·jani Electoral Registration office-o dorgasto galahachim,” ine AHAM South Western Zone-ni general secretary parakataha.
AHAM-ni RTI-o sing·sandiatgipa mongsonggipa bakrangni giminde PIO talataniko on·jaha indiba sing·anirangoni 20 percent-kosan aganchakaiaha ine janapatengon, candidate-rangni on·na sikjahani giminsa iarangni bidingo aganchakaniko ba talataniko on·jaha ine PIO aganchakaniko on·skaaha ine Sangma parakataha.