SHILLONG: Meghalaya a·dokni Contingency Fund-ko gong kror 500-oni gong kror 1000-ona bariatna gita Sukrobar salo a·dokni Cabinet, Meghalaya Amendment Ordinance 2024-ko ra·chakangaha.
Sukrobar salo Cabinet tom·a matchotani ja·man kobor ra·timgipa manderangna talataniko on·angengon, Assembly-o gipin dabianirangko ra·chakjaskal somoi batahaon tangka paisa jakkalaniko champengna budget-ni niam dongani gimin ia Meghalaya Amendment Ordinance-ko uamang ra·baaha ine a·dokni Chief Minister Conrad K Sangma parakataha.
Chief Minister-ni parakatani gitade, koros nangarangna dabidapanirangko sorkari pass ka·ja skalde tangka paisarang donggenchimoba uarangko sorkari jakkalna gita man·jachim.
“Da·o niamko pass ka·ahani gimin Assembly-o supplementary demand-rangko pass ka·na man·jagenchimoba nangchongmotan somoirangode nanggitikan somoirangona chamgipa tangka paisarangko jakkalsona man·gnok. Uni gimin ian contingency fund-ko gong kror 500-oni gong kror 1000-ona bariatna dongimin niamsan ong·aia maina an·ching ma·mong sorkarioniko tangka paisarangko man·dapenga,” ine Sangma aganaha.
Da·ode a·dok sorkari, badiaba kamrangko ka·na gita ma·mong sorkarioniko tangka paisarangko man·sona gita ka·dongna man·gnok ineba Chief Minister aganaha.
Indake ong·engon, Meghalaya Civil Task Force Act 1974-ko ra·galna gita proposal on·anikoba Cabinet ra·chakangaha ine Chief Minister parakatjolaha.
“Repeal Act-ko chinga Assembly-ni changgipa session-ona ra·anggnok,” ine ua aganaha.
Re·baenggipa January-ni 26 tariko, a·songni Republic Day-ko maniani somoio dingtang dingtang biaprango VIP ong·e soknagipa bimingrangkoba Cabinet-ni tom·anio tik ka·angjolaha ine Chief Minister parakataha.
