SHILLONG: Meghalaya a·doko Inner Line Permit (ILP) ra·gatchina dabianiko aro Khasi-Garo ku·sikrangko Constitution-ni Eighth Schedule-o chapatchina dabianirangko knachakjaengani gimin Sukrobar salo, Hynniewtrep Youth Council (HYC)-ni membor-rang, ma·mong sorkari aro Union Home Minister Amit Shah-ni kosako jegalaniko mesokna gita gisim balloon-rangko kosakchi watataha.
Sukrobars salo, North Eastern Council (NEC)-ni plenary session-ko dilna gita Union Home Minister Amit Shah, Bristibar salon Shillong-ona re·baahachim aro uandaken Shillong songjinmao una chel·chakanirangko on·na gita police-rangko pilak biaprangon donattokahachim.
Indake ong·engon, HYC-ni membor-rang Sukrobar salo, Civil point bibrao donggipa U Kiang Nangbah-ni mangkrong mikkango, banner aro poster-rangko ra·bite, ma·mong sorkarini kosako jegalanirangko dakangtokaha.
Iani bidingo kobor ra·timgiparangna talataniko on·angengon, Meghalaya a·dokni manderang ILP-ko dabiengoba da·alonan ma·mong sorkari maming aganchakanirangko on·kujaengani giminsa Union Home Minister gita ma·mong sorkarina u·iatna da·alo jinma jegalanirangko dakenga ine HYC-ni president Roy Kupar Synrem parakataha.
“Meghalaya a·dokko ma·mong sorkari, India a·songni bak ong·nikjaenga ong·ode chingna talate on·na nanga maina chinga iandake nichanggalaniko man·a kragiparang ong·jachim. Manipur a·dokna ILP-ko on·na man·aha ong·ode maini gimin ma·mong sorkari, Meghalaya a·dokna on·na man·skajaenga?” ine Synrem sing·doataha.
HYC president-ni parakatani gitade, ILP-ko dabiani aro a·dokni ku·sikrangko Eighth Schedule-o napatchina dabiani bidingo a·dokni Chief Minister aro Deputy CM baksa agangrika changantian, iani bidingo Union Home Ministry-sa jako ra·e nipiltaienga ine aganchakaniko on·rongaiachim.
“A·dokni ku·sik minggniko Eighth Schedule-o napatchina dabie 2018 bilsio aro ILP-na dabie 2019 bilsion Meghalaya Assembly resolution-koba pass ka·ahachim indiba ma·mong sorkari, Meghalaya a·doko songdongenggipa manderangni nangnikanirangko chu·sokatna gisik nangteljaenga. Iani bidingo a·dokni CM aro Deputy CM-ba tale aganchakanirangko on·na man·jaenga,” ine Synrem aganaha.
ILP-ko ra·gate on·kujaskal aro Khasi-Garo ku·sikrangko Eighth Schedule-o chapate on·jaskal HYC dabianirangko dontongkujawa ineba ua aganaha.
Meghalaya Residents Safety & Security (Amendment) Bill 2020-ko pass ka·na man·na gita ta·raken ja·kurangko de·china gitaba HYC-ni president, a·dok sorkariko didiataha.