TURA: Sukrobar salo, Tura-o gital rikgipa Pa Togan Nengminja Athletic Stadium-ni mitam bakrangko nosto ka·ahani gimin police-rang, dos dakgipa mandeko rim·aha.
Ia stadium-ara katsusaani, bilsusaani aro uandakgipa kal·susaanirangko sokachakna rikgipa stadium ong·achim aro ia stadium-on da·o Tura-o ong·atenggipa Meghalaya Games 2024-ni mitam kal·susaanirangkoba ong·atahachim.
Indake ong·engon, Sukrobar pringo mande saksa, ia Pa Togan Nengminja Athletic Stadium-o napenba, ia stadium-ni mitam bakrangko nosto ka·aha aro uandaken ja·mano police-rang, dos dakgipa mandeko rim·na man·aha.
Jinmani namgnina rike on·gipa stadium-ko iandake nosto ka·ahani gimin suk ong·gijaniko parakatengon, sorkarini bosturangko nosto ka·aniara sasti man·na kragipa kam ong·a aro ian kal·susaanirangko namdapatna aro manderangni namgnina on·gipa gam-jinko nisie galani gita ong·a ine Sports & Youth Affairs department-ni Director parakataha.
“Tura-o gital rikgipa Pa Togan Nengminja Athletic Stadium-ara kal·susaanio gisik nanggipa manderangna, chatro chatrirangna aro Tura-ni chadamberangna namen mongsonggipa kal·chakram biap ong·a aro ian A·chik matgrikko mande ra·na gita uni bimingchi minge dongimin stadium-sa ong·achim. Iandake sorkarini rike on·gipa gam-jinko nisie galaniara Athletic stadium-ko chalaianio champengatani gitasan ong·aigija kal·susaanirangko namdapna gita sikenggipa bi·sarangni ka·dongsoanirangko champengani gitaba ong·enga,” ine sorkari official parakataha.
Manderangni namgnina rikgimin gam-jinrangko banoba iandake nosto ka·anirangko nikgenchimode police-rangna kobor on·china gitaba Sports & Youth Affairs department-ni Director didiataha.
