SHILLONG: Ia bilsini gisepo ong·atna sienggipa Lok Sabha election-na Meghalaya a·doko pilak dolrangan tarisamsotokengahaoba da·o dipet BJP aro TMC dolrangde kamrangko name ka·chakatskakujaenga ine nikna man·a.
Meghalaya a·doko NPP, Congress, UDP, HSPDP aro uandakgipa dolrang pilakan an·tangtangni candidate-rangko parakna a·bachengtokengaha aro mitam dolrangde, dingtang dingtang biaprangona wenroroe campaign-koba ka·na a·bachengengahachim.
Indake ong·genchimoba, BJP aro TMC dolrangde, kamrangko ka·chakatna gita high command-ni u·iatanikosa senge dongskakuenga.
Meghalaya a·dokni Shillong aro Tura Parliamentary constituency-rangna BJP-ni adita sak candidate-rangko mingsoengoba da·o dipet BJP-ni dilgiparang, darangkoba biming mingsrangade ong·kujaenga aro uamang ma·mongni dilgiparangnasa senge dongskakuenga.
Meghalaya a·dokni constituency damsaosan ong·aigija damgni constituency-rangon susana man·genchimode nambatgen ine adita salrangna skangsan BJP-ni MLA Sanbor Shullai-ba BJP-ni candidate-rangko seng·gnangkale parakchina didiatahachim ine nikna man·a.
TMC dolko niatskagenchimode, da·onan TMC-ni dilgiparang, ia Lok Sabha election-o susagenma susajawa name aganna man·skakujaenga aro uamangba high command-ni u·iataninasa senge dongkuengachim.
Lok Sabha election-ni bidingo agangrikna gita Meghalaya TMC-ni president Charles Pyngrope aro Parliamentary Party-ni dilgipa Mukul Sangma baksa bakan Kolkata-ona re·anggen ine adita salrangna skangsan TMC-ni dilgiparang parakatahachim.
TMC aro Congress dolgnian INDIA bloc-o bak ong·paengani gimin a·dokni Lok Sabha seat-rangko sualgrikani giminba chanchiengachim indiba da·onan dolgnini gisepo iani gimin srange aganna man·skakujaenga.
