SHILLONG: Meghalaya a·doko niam gri koela bikotaniko National Green Tribunal (NGT)-ni champengataoni da·o bilsi 10 ong·pilengahaoba, scientific mining ba niamo pangchake koela bikotaniko a·doko da·onan a·bachengatchipna man·kujaenga.
Batanggimin bilsirangonin a·doko niam gita koela bikotaniko a·bachengatna man·gnok ine sorkari ku·rachakaniko on·ahachim indiba da·alonan niamo pangchake koela bikotaniko a·bachengatna man·kujaengachim.
Iani bidingo sing·anina aganchakaniko on·angengon, ma·mong sorkarini dongimin niamrangko da·o talatna gita man·engaha aro a·doko niam gita koela bikotaniko bakan a·bachengna man·gnok ine Mongolbar salo, a·dokni Chief Minister Conrad K Sangma ku·rachakaniko on·angtaiaha.
Chief Minister-ni parakatani gitade, mining plan-rangko ma·mong sorkarini ra·chakani ja·manba dingtang dingtang nangchongmota kamrangna a·dok sorkariona sokbapilenga aro a·doko niam gita koela bikotaniko a·bachengna skang public hearing baksana dingtang dingtang dakna nangani kamrangba dongkuengachim.
Meghalaya a·doko niam gita koela bikotaniko a·bachengnade ma·mong sorkarini dongimin dingtang dingtang niamrangko ja·rikna nanggen ine iana skangba Chief Minister aganahachim.
Niamo pangchake koelarangko bikotanio bang·en dakna nanggnirang dongani a·selsa somoirangko nangkuenga ine janapatengon, niamo pangchake koela bikotaniko a·bachengatna skang, koela bikotgiparangna naljokaniko on·ani, samtangtango ong·telaigiparangko chel·chakani aro uandakgipa dingtang dingtang nanga kamrangkoba matchotatchenggen ine Chief Minister parakataha.