SHILLONG: Meghalaya a·dokni Anthem ba ring·anio Jaintia ku·sikko watchanggale, Khasi, Garo aro English ku·sikkosa jakkalahani gimin Jaintia Hills-ni dingtang dingtang dolrang aro MLA-rang jegalgrimtokengon, ia Anthem ba ring·aniko Meghalaya State Language Act 2005-o pangchakesa tariaha ine sorkari talataniko on·angskaaha.
Iani bidingo aganchakaniko on·angengon, sorkari je kamko ka·genchimoba pangnan niamo pangchakesa ong·na nanga aro a·dokni ring·anioba Meghalaya State Language Act 2005-o pangchakesa ong·na nanga ine a·dokni Chief Minister Conrad K Sangma parakataha.
Meghalaya a·doko English ku·siksa official language ong·e, Khasi aro Garo ku·sikrangba associate official language-rang ong·engachim ine nikna man·a.
State Anthem ba a·dokni ring·anio English, Khasi aro Garo ku·sikrangko jakkalahani gimin a·dokni Art & Culture Minister Paul Lyngdoh-ba chakpaaniko janapatengon, Meghalaya State Language Act 2005-ko taridapkujaskal, a·dokni ring·aniko taritaina man·jawa ine parakataha.
“Language Act-ko taridapkujaskal darangba ia ring·anio dingtang ku·sikrangko ra·dape taridapna man·jawa,” ine Lyngdoh aganaha.
Ia gitni kattarangko name knatimgenchimode ian ku·cholsan ong·aniko dabiani giminsa tariahani gimin ia State Anthem ba a·dokni ring·aniara Meghalaya a·dokko ku·cholsan ong·atani giminsa ong·a ineba ua aganaha.
Khasi aro Jaintiarangara apsan jat gitan ong·e apsan ku·sikkon aganani gimin Khasi aro Jaintia-ni gisepo maming dingtanggrikani dongja ineba Lyngdoh, an·tangni bebera·aniko aganaha.
Khasi aro Garo ku·sikrangko Constitution-ni Eighth Schedule-o napatna dabianio kamrangko altubatatna gitasa ia a·dokni ring·aniko tariaha ineba Lyngdoh aganaha.