SHILLONG: 2018 bilsioni Meghalaya a·doko rama jal·langrangko namdapatna gita a·dok sorkari, gong kror 10,000-mangni gita tangka paisarangko koros ka·aha ine Sombar salo, a·dokni Deputy Chief Minister aro PWD (Roads) Minister Prestone Tynsong parakataha.
Sombar salo, PMGSY-ni kamrangko nipilna gita PWD department-ni official-rang baksa tom·ani ja·man kobor ra·timgipa manderang baksa agangrikengon, dingtang dingtang rama tariani program-rang baksana a·dok sorkari, songantionan ramarangko sokate on·na kamrangko ka·enga ine Tynsong parakataha.
PWD Minister-ni aganani gitade, ia bilsini gisepo a·dok sorkari, dingtangmancha CM Connect program-koba a·bachengataha aro ia program-ni ning·o sorkari, rama jal·lang dongkugijagipa dam 250-oni dam 300-mangni gita songrangona rama jal·langrangko tarianggen.
A·doko rama jal·langrangko tariani namjaengani gimin sing·on, rama jal·langrangko tarianio name tarina gita a·doko niamrangko donmanaha ine Tynsong parakataha.
Rama jal·langrangko tarianio kamrangko name nirokchina gita ua junior engineer-ni gadangona kingking official-rangna ge·etaniko on·manaha ineba Deputy Chief Minister aganaha.
National Highway, State Highway aro a·jani ramarangna dingtang dingtang dongimin niamrang donga ine janapatengon, “Ramarangko tarianio nambatakosa on·na anga nangnikenga,” ine Tynsong parakataha.
PMGSY-ni skanggipa aro gnigipa bakrangko ia bilsini March jaon matchotatchina ma·mong sorkari somoiko donmanaha ine janapatengon, Meghalaya a·doko matchotna nangkuenggipa PMGSY project-rang bang·gijasan dongaiaha ine PWD Minister parakataha.
“Ia kamrangko adita jarangni gisepon matchotgnok ine chinga ka·dongenga aro kamrangko matchotahaon, Ministry-ni dongimin niam gita chinga 100 percent nisanko chu·sokatgnok,” ine ua aganaha.
