GH-ni ma·manti gamrangko niam gri badingsrukenga ine ANYO badi ka·a

TURA: Garo Hills-o donggipa bol wa·arang, a·ningni bosturang aro ma·manti gam-jinrangko ma·sina man·gijagipa dolrang, niam gri badingsrukenga ine A·chik National Youth Organisation (ANYO), West Garo Hills a·jani Deputy Commissioner-na seachi badi ka·doangaha.

Iani bidingo West Garo Hills a·jani Deputy Commissioner-na seachi badi ka·doangengon, Garo Hills-ni bol wa·arang aro ma·manti bosturangko saljrakjrakon dingtang dingtang department-ni nikanio badingsrukangenga indiba iandakgipa manderangko da·alonan champenganirang dongjaenga ine ANYO-ni dilgiparang parakataha.

“Garo Hills-ni bol wa·a, an·cheng, ro·ong aro ma·manti bosturangko saljrakjrakon truck aro pick-up garirango salangenga aro iani bidingo songni manderang, NGO-rang baksa bakrime, sing·sandianirangko dakon uamangoniko nangchongmotgipa lekkarangko man·rongja. Garo Hills-ni gam-jinrangko bang·bata salrangon Bangladesh a·songona salangenga,” ine ANYO-ni dilgiparang parakataha.

ANYO-ni parakatani gitade, Garo Hills-ni dingtang dingtang biaprango sawmill, stone quarry aro bol-wa·arangko tarigipa karkanarangko niam gri chalaiengani a·sel, iandakgipa bosturangko gipin biaprangona ra·angna man·enga aro iandake niam gri badingsrukanirangko name nirok sandianirang dongjaenga.

Garo Hills gita salantian matchu matterangko Bangladesh a·songona salangenga aro niam gri koelarangko bikotenga salangenga ineba ANYO badi ka·doangaha.

“Iandake Garo Hills-ni gam-jinrangko badingsrukanio bilo ong·enggipa manderang baksa aro joltangni manderang baksa bak ong·enggipa manderangan jak dongna nanga ine chinga chanchichipenga maina bang·a changon maming lekka gri ba permit gri salgipa garirangko songni manderang rim·e police-rangna ba nangchakegipa department-rangna pakwate on·genchimoba uamang jokpilrongna man·aia,” ine ANYO-ni dilgiparang parakataha.

Iandake niam gri badingsrukanirangko uamang nie dongchajawa ine mikrakataniko on·angengon, Garo Hills-ni gam-jinrangko niam gri badingsrukanio jak donggipa manderangko rim·na man·na gita Nokmarangna aro songni committee-rangna dakchakanirangko on·china gita ANYO-ni dilgiparang, Police aro Forest department-ko didiataha.