TURA: Ia bilsini Lok Sabha election-o komibeoba sakgittam candidate-rang, Bharatiya Janata Party (BJP)-ni tikitchi, Tura Parliamentary constituency-oni susana sikenganiko paraktokaha.
Koborko man·soani gitade, ia bilsini Lok Sabha election-o Tura Lok Sabha constituency-oni susana gita Tura-ni MDC Bernard N Marak, 2023 bilsini Assembly election-o BJP-ni candidate ong·e Songsak constituency-o susagipa Thomas Marak aro GHADC-ni gitcham CEM Boston Marak, Sombar salo, BJP-ni tikitna BJP-ni state president Rikman Momin-na dorgastorangko galetokaha.
Iana skangde, Tura-ni MP aro NPP-ni candidate Agatha K Sangma baksa susana gipin dolrangni candidate-rangkosa ka·dongsotokengachim indiba da·o BJP-ni tikitna komibeoba sakgittam candidate-rang dorgastoko galahani gimin BJP-koba susaanio niksamsona man·engaha.
INDIA bloc-o bakrimenggipa TMC aro Congress dolrang, a·songni bang·bata Lok Sabha constituency-rangon seat-rangko sualgrikna tik ka·ahaoba Meghalaya a·dokode ia dolgnini gisepo da·onan seat-rangko sualgrikna gita tik ka·kujaengachim.
Meghalaya a·doko TMC dolni gita Shillong Lok Sabha seat-ko Congress dolna on·e, Tura seat-ko an·tangtang ra·skana tik ka·engoba Congress dolde iako ra·chakskakujaengachim ine nikna man·a.
Koborko man·soani gitade, Tura Lok Sabha seat-o Congress dolni gita da·o Gambegre constituency-ni MLA Saleng A Sangma-san tikitna susagipa dongaiaha maina a·dokni gitcham Cabinet minister Deborah Marak-de susana gita nangnikskajaengaha.
Tura Lok Sabha seat-oni susana gita da·o dipet Saleng Sangma-mangmangsan Congress-ni tikitna dorgastoko galengkuani gimin unan Congress dolni tikitko on·na gita dilgiparang tik ka·aha ineba koborrangko man·soaha.
