SHILLONG: Ia bilsini Lok Sabha election-o Tura Parliamentary constituency-oni susana gita Congress dolni tikitko Gambegre constituency-ni Congress MLA Saleng A Sangma-na on·naba gnang.
Meghalaya Pradesh Congress Committee (MPCC)-ni president aro Shillong-ni Lok Sabha MP Vincent H Pala-ni kobor ra·timgiparangna parakatani gitade, Tura Lok Sabha constituency-oni susana gita da·o dipet Gambegre-ni MLA Saleng Sangma-san Congress dolni tikitna dorgastoko galkuengpiti.
“Congress candidate-rangni dorgastorangko nipilna gita Congress dolni screening committee tom·aniko ong·atanggen aro uni ja·man, candidate-rangni dorgastorangko Central Election Committee-ona watdoatgen,” ine Pala talataniko on·angaha.
Congress dolni mitam chadambe dolrang, Saleng-ko Tura parliamentary seat-ni candidate-na nangniktokengon, mitam me·chik dolrangde Williamnagar-ni gitcham MLA aro a·dokni gitcham cabinet minister Deborah C Marak-ko nangniktokskaenga ine adita salrangna skangsan MPCC-ni president Vincent H Pala parakatahachim.
Tura Parliamentary election-rango Purno A Sangma-ni nokdang baksa susagiparangoni Deborah Marak-mangmangsan Sangma-ni nokdangko chena sigipa ong·aiachim maina gipin susagiparangde Sangma-ni nokdang baksa susaanio maming daken sokrikpajahachim ine nikna man·a.
Indake ong·genchimoba, Saleng Sangma-ba Congress dolo napangani ja·man, Garo Hills-ni bidingo ku·rang on·batgipa ong·e Garo Hills-o da·o niksengbatgipa dilgiparangoni saksa ong·skaengachim.
Indake ong·engon, Shillong parliamentary constituency-oni susana gita da·o dipet MPCC-ni president aro da·o Shillong-ni Lok Sabha MP ong·enggipa Vincent Pala-san Congress dolni tikitna dorgastoko galkuengpiti ine Congress dolni mitam dilgiparang parakatskaaha.
Shillong-ni MP Vincent Pala da·o brigipa changna seokako man·na gita susataiengon, ia chang Shillong Lok Sabha constituency-o unbaksa NPP-ni Ampareen Lyngdoh, UDP-HSPDP dolrangni apsan seokgipa candidate Robertjune Kharjahrin aro VPP-ni Ricky AJ Syngkon-ba susana siengachim.
