MPOWER program-ko M’laya Cabinet ra·chakanga

SHILLONG: Dingtang dingtang program-rangchi dal·drobaenggipa chadamberangko kamrango nambatatna miksonganio a·dokni Cabinet, Meghalaya Multi-Sectoral Project for Adolescent Well Being, Empowerment, and Resilience (MPOWER) program-ko Sukrobar salo ra·chakangaha.
Ia program-ni bidingo talataniko on·angengon, a·doko dal·drobaenggipa chadamberangko, skuloni kamrangko ka·na ong·kataona kingking, an·seng baljokaniko on·anichi chadamberangni janggi tanganio dingtanganiko ra·bana gita ia MPOWER program-ko a·dok sorkari a·bachengataha ine official-rang parakataha.
Official-rangni u·iatani gitade, ia program-ni ning·o bilsi 9-oni bilsi 19-ona kingking dal·drobaenggipa chadamberangna dingtang dingtang dake nirok sandianirangko on·anggen aro ian skulo poraienggipa aro poraianiko dontonggipa chadamberangnaba ong·gen.
“Ia program-ni bak gita a·dok sorkari, dingtangmancha Meghalaya Human Development Council-ko songaha aro ia committee-an Chief Minister-ni dilanichi, chadamberangko dingtang dingtang kamrango namdapatna gita nirok sandianirangko on·anggen,” ine sorkari official-rang parakataha.