TURA: Meghalaya a·doko niam gri koela bikotaniko champengatani ja·manba, niam gri koelarangko bikotengkua aro tangka paisarangko gile ra·enga ine matnangatenba, mande sakbongani kosako Mawshynrut constituency-ni gitcham MLA Francis Pondit R Sangma baksana sakgipin Jorminath R Sangma minggipa mande, FIR ka·doangaha.
FIR-ko uamang, January-ni 30 tariko, West Khasi Hills a·jani Superintendent of Police (SP)-na ka·doangaha aro uamangni FIR-o janapatani gitade, a·doko niam gri koela bikotaniko champengatahaoba ia manderang, niam gri koelarangko bikotengkuachim.
FIR-o uamangni matnange biming mingatgipa manderangara, Riangdim-ni Rosten R Sangma, Kallu-ni Nengnang R Sangma, aro Bokchung songni Walling N Marak, Geren M Sangma aro Dewing M Sangma ong·achim.
Gitcham MLA aro sakgipin Jorminath R Sangma-ni FIR-o parakatani gitade, matnangako man·gipa manderang, Riangdim Milsam a·bri aro Bappa a·brio donggipa A·gal koela a·damoniko niam gri koela bikotengachim aro ia biaprangoniko niam gri koela bikotenba ja·mano uamang, Shallang aro Jadigittim jolrango chimongenba ma·sina man·gijagipa manderangna palatskaengachim.
Ia apsan manderangan, Riangdim aro Rajagolla PWD rama gita koela salruraenggipa truck garirangoniko niam gri kajina gile ra·enga ineba uamang FIR-o parakataha aro ia manderangni kosako rakgipa ja·kurangko de·china police-rangko didiataha.
