Tura: Meghalaya Koch Association (MKA) chang 54-gipa Annual Koch Conference cum Cultural Programme-ko February 2 tarikoni 4 tarikona ong·a-tenga, ia programme-o a·dokni Chief Minister Shri Conrad K Sangma aro mongsonggipa MLA-rang aro jatni dilgiparang dongpaaha. Tom·aniko South Garo Hills-ni Jatrako-na-o ong·ataha, Koch ku·-sikko tang·doatna aro ripingani bidingo agan-grikaniko dakaha.
Ku·siktangko ripinge chel·chakna nangani mong-songgipa katta bichong-rangni gimin tom·bagipa mande jinma Chief Minister Sangma aganangaha. Meghalay a·dokni Koch a·jarangni skulrango Koch ku·sikrangko chanchapat-na namnike ra·bagipako parakna on·kanganina ua kusi ong·aniko parak-angaha. Chadamberangko bilakatani bidingo Chief Minister-ni ja·ku de·-giparang jekai PRIME, CM-ELEVATE aro YESS Meghalaya ong·a ine tom·ani somoio aganaha.
Tom·anio Koc jatni batanggimin dakbewal-rangko mesokan baksana namroroanina ja·ku de·anio cross-cultural education-naba didijolani ong·gen aro a·dokni dingtang dingtang daka rikanirangko de·-mittelaniba ong·gen, ine Chief Minister aganaha. Chel·chakna aro gamchat-giparangko namroroatna cultural centre-rangko kulina sorkarina dakchak-paaniko on·china ua agandapangaha.
Assamese aro Bengali ku·sikrangko skulrango ra·ani pal jatangni ku·sik-rang jekai Koch, Hajong aro ugita dakgiparangko tang·-doatna Meghalaya Koch Association-ni ku·pat-tianiko rimchaksoanganio Chief Minister aganaha, “Songtang a·jatangni ku·sikrangko ma·siangna aro tang·doatna gamchate ra·anio New Education Policy donggenchimoba India-ni gamchatgipa jatni ku·siktangko nipilanio chanchianggen,” ine ua aganaha aro Koch Association-ni dakchakanichi ia kam matchotataona sokgen ine ua ka·donganiko on·aha. New Education Police baksa uamangni nangnike ra·bagipa memorandum-ko MKA Chief Minister Conrad K Sangma-na on·aha, je bipaon Koch jat dongbatgipa biaprango Lower aro Upper Primary skulrango ge·etani medium-o Koch ku·sikko ra·chap-china mol·molangaha. Ia proposal-ko sorkari ra·chakgen ine Sangma Koch jatna ka·donganiko aganaha.
MKA-ni memorandum-o ku·sikko ripingna ra·bagipa baksana Koch songrango career coun-seling centre-rangko kulina Meghalaya sorkarioniko tangka paisachi dakchak-aniko on·pachina mol·mole seaha. Iako kulina miksong-anian dmbegipa me·a aro me·chik bi·sarangna susagipa porikkarangna tarisamsona miksongani ong·a, maina Koch jatni gisepo komigipa literacy rate ong·enga. Sorkari kamrango chadambe-rangna cholrangko on·-angna komibeoba 15%-na miksonganio minority jatrangna reservation percentage-ko bariatna nang-ani bidingoba MKA jatni ra·bianirangko agan-talatanio janapangaha. Chang 54-gipa Annual Koch Conference-ko matchotatanio, Koch jatko tang·doatna aro jatni dakbewalko ripingna aro ku·siktangko gamchate ra·na sorkarini namgipa ja·ku de·anina ian ka·donge dongkuaigen, ine MKA aganaha. Sakgipin dilgipa-rang jemangan program-o dongpaa uamanga-ra, Sal-manpara MLA Ian Botham K Sangma, Baghmara MLA Kartush R Marak, MLA, Chokpot, Sengchim N Sangma, Betasing-ni MDC gitcham, Nripen Koch, Barengapara-ni MDC, Pramod Koch aro MKA-ni president Jibananda Koch.
Caption:Meghalaya South Garo Hills Jatrakohona-o Meghalaya Koch Association-ni 54-gipa Annual Conference-o Chief Minister Conrad K Sangma dongpao noksa jachipchang de·enga. UB