TURA: South Garo Hills a·jani diltubatsranggipa biaprango, ma·mong sorkarini ra·gate on·gipa scheme-rangko ra·anio neng·nikanirangko man·na nangtokenga ine koborko man·soahani gimin ia antion ua, South Garo Hills a·jani dingtang dingtang songrangona wenanggen ine Tura-ni MDC aro BJP-ni state vice president Bernard N Marak parakataha.
Marak-ni parakatani gitade, Mongolbar attamni 4:00 bajimango ua Emangre songona re·ange manderang baksa ma·mong sorkarini scheme-rangni gimin agangrikegen aro Budbar pring 9:00 bajimango ua Mahadeo songona re·ange songni manderangko grongeskagen.
Apsan daken, Budbar attamni 1:30 bajimango ua Dulbeta aro Hatisia songona re·anggen aro Budbar attamni 4:00 bajimango ua Kanai songona re·angskagen ine Marak parakataha.
Bristibar pringni 9:00 bajimango ua Moheskola aro samba jolo donggipa songrangona re·angskagen aro Sukrobar salo ua East Garo Hills a·jani Baija aro Chiading songrangonaba re·ange songni manderang baksa tom·e agangrikanggen ine Tura MDC parakataha.
“Angni ia songrangona re·anganio, ma·mong sorkarini scheme-rangko ra·anio maiba neng·nikanirangko man·enga ong·ode angona seachi badi ka·e ra·bana man·gen. Jatni neng·nikaniko nike namdapaniko ra·bana songrangona wenangengon nangnikaniko janapna jajrenga gri ong·katbachina public-ko mol·molata,” ine Tura-ni BJP MDC Bernard Marak parakataha.