SHILLONG: Ra·gala man·gipa Meghalaya Lokayukta-ni official-rangko kamo ra·pilchina Voice of the People’s Party (VPP)-ni dabianiara politics kal·na jotton ka·ani aro manderangko dilsretna jotton ka·anisan ong·aia ine Sombar salo, a·dokni Cabinet Minister aro MDA-II sorkarini ku·wattimgipa Paul Lyngdoh matnangatenba, Lokayukta official-rangko niamo pangchakesa kamoniko ra·galaha aro maming dakeba sorkari, niamni kosako re·badena man·jawa ine talataniko on·angaha.
Lyngdoh-ni parakatani gitade, kamoni neng·takgimin manderangko Lokayukta-ni official dake rakkina man·ja ine dongimin niaman dongani giminsa Lokayukta-ni sakgittam official-rangko ra·gale, uamangni biapo gipin official-rangko rakkiskaahachim.
“Lokayukta-ni niamo pangchakesa sorkari, ia sakgittam official-rangko ra·galaha maina ian Lokayukta-ni mongsonggipa niamba ong·a. Kamoni neng·takgimin official-rangni bilkode kamo ong·kuenggipa official-rangna bate bil komibata ine chanani donga aro chinga ia niamko re·badena man·jawa,” ine Lyngdoh aganaha.
Ra·gala man·gipa Lokayukta official-rangko kamo ra·pilchina gita VPP-ni dabienggipani bidingo janapatengon, iani bidingo VPP-ni dilgiparang politics kal·e, manderangko dilsretna jotton ka·enga ine Cabinet Minister parakataha.
“Iani bidingo politics kal·e manderangko dilsretna jotton ka·aniara niamni a·palo ong·a aro ian gipin nangchongmotgipa kamrangni gimin manderangni chanchianiko ra·e katna jotton ka·ani gitasa ong·a,” ine Lyngdoh aganaha.
Garo Hills Autonomous District Council (GHADC)-o da·o ong·enggipa NPP MLA-ni tangka jakkalsretaniko parakatani ja·man a·dok sorkari, Lokayukta-ni Investigation Officer sakgittamko Whatsapp message gita kam ra·galatahachim ine nikna man·a.
Ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Indake ong·engon, ra·gala man·gipa Lokayukta official-rangko kamo ra·pilchina dabie, iani bidingo VPP-ni dilgiparang, a·dokni Chief Minister Conrad K Sangma baksa agangrikna senge dongengachim.