SHILLONG: Meghalaya Lokayukta-ni official sakgittamko sorkarini ra·galanina VPP aro dingtang dingtang dolrang matnange, ia official-rangko kamo ra·pilchina dabitokengon, iani bidingo sorkari a·bachengon talataniko on·manaha aro jemangan sorkarini talataniko chu·ongnikkujaengachim, an·tangtangan niamrangko poraie nina man·gen ine Budbar salo sorkari parakataha.
Lokayukta-ni official-rangko ra·galani bidingo sorkariko matnanganichi darangnaba namgniko ra·bajawa ineba sorkari, iani bidingo matnanganiko dontongchina gitaba matnangenggipa dolrangko didiataha.
“Lokayukta-ni official-rangko ra·galani bidingo talataniko on·manaha ine anga an·tangde bebera·a. Saoba ia talatanirango ra·chakna man·kujaenga ong·ode niamrangko ja·rikna man·gen. An·ching iani bidingo matnanganiko dontongo nambatgen maina iani bidingo matnanganichi darangba namgniko man·jawa,” ine a·dokni Cabinet Minister aro MDA-II sorkarini spokesperson Ampareen Lyngdoh aganaha.
Official-rangko term matchotgija ra·galaniara contract-ni niamrangko pe·ani ong·a aro iani bidingo kakketko ma·sina gita aganchakaniko on·na nanga ine iana skang, ra·gala man·gipa Lokayukta official-rangoni saksa J Rymmai aganahachim.
Iana aganchakaniko on·angskaengon, uamangni kosako sorkari ong·gija dakaha ine uamang chanchienga ong·ode, maming ma·sisretgrikani grian uamang dingtang dingtang cholrang donga ine Lyngdoh parakatskaaha.
Iani bidingo ua mamingkoba agandapna gitaba Lyngdoh jechakaha.
Garo Hills Autonomous District Council (GHADC)-o da·o ong·enggipa NPP MLA-ni tangka jakkalsretaniko parakatani ja·man a·dok sorkari, Lokayukta-ni Investigation Officer sakgittamko Whatsapp message gita kam ra·galatahachim ine nikna man·a.
Ra·gala man·gipa official-rangara, Inquiry & Prosecution-ni Director (gitcham IPS officer) J Rymmai aro Inquiry-cum-Investigating Officer sakgni R Pde aro Anil K Sangma ong·achim.
Indake ong·engon, ra·gala man·gipa Lokayukta official-rangko kamo ra·pilchina dabie, iani bidingo VPP-ni dilgiparang, a·dokni Chief Minister Conrad K Sangma baksa agangrikna senge dongskakuengachim.