Wah Umkhrah aro Umshyrpi chiringko rongtalatna sorkari ja·ku de·chakata

SHILLONG: Shillong songjinmani mongsonggipa chiringrang, chong·motan Wah Umkhrah aro Umshyrpi chiring dilgniko rongtalatpilna gita sorkari ja·kurangko de·chakataha ine Budbar salo, a·dokni Chief Minister Conrad K Sangma, Polo-o Wah Umkhrah Riverfront Development Project-na pangchakaniko songe on·angani somoio parakataha.
Ia pangchakaniko songe on·na gita tom·aniko ong·atanio, Shillong songjinmani dingtang dingtang Dorbar Shnong-rangna My City Campaign-ni ning·o, gong 75,000 aro gong 1,50,000-ni cheque-rangkoba a·dokni Chief Minister Conrad K Sangma aro Deputy Chief Minister Sniawbhalang Dhar-ni jakchi suale on·angjolaha.
Wah Umkhrah aro Umshyrpi chiringrangko rongtalatna gita nangchongmotengaha ine janapatengon, iana proposal-ko gital dake taritaipilchina ma·mong sorkari aganahani gimin da·o iana proposal-ko a·dok sorkari nipiltaiengaha ine Chief Minister parakataha.
“Chiring chibisikrangko nitoatmangmanganiara ong·gramanisan ong·aigen aro ia Wah Umkhrah-ni wilwilao donggipa biaprangko taridapna aro chiringko ripinge rakkina gita ia Wah Umkhrah Riverfront Development Project-ko ra·gataha. Wah Umkhrah baksana Umshyrpi chiringkoba rongtalatna gita a·dok sorkari, India sorkarini ning·o donggipa Jak Shakti Ministry baksa nangrime kamko ka·enga,” ine Chief Minister aganaha.
Ia Wah Umkhrah Riverfront Development Project-ara, Wah Umkhrah-ko manderangni rochakgipa aro songsalni kamrangna jakkaltogipa ong·atna gita gong crore 39 koroschi taridapna sienggipa project ong·a aro ian Wah Umkhrah-ko tangatpilasan ong·aigija dingtang dingtang gital kolrangchi taridapna sienggipa project-ba ong·engachim.
Shillong songjinmani apchangket ong·aniko komiatna nangengani gimin janapatengon, garirangko donchakna aro ramarango ma·manti bosturangko palbadinge cha·enggipa manderangna sorkari, dingtang dingtang biaprangko sandimanaha ine Chief Minister parakataha.
Chief Minister-ni aganani gitade, Hotel Polo Towers aro Majestic Hotel-ni gisepo donggipa biapko Forest department-oniko Urban Affairs department-na apjitatskagen aro ia biapo garirangko donchakna gita sorkari taridapgen.
“Iana agreba, Meghalaya Secretariat-ni sambao donggipa biap baksana dingtang dingtang biaprangko gari donchakna gita taridapgen,” ine Sangma aganaha.
Police Bazar aro Bara Bazar-o skatang garirangni re·ruraani a·sel apchangket ong·engani gimin janapatengon, garirangni skatang napaniko champengna choking point-rangko aro bus garirang baksa taxi-rangnaba donchakni biaprangko tarina sorkari tik ka·aha ine Chief Minister parakataha.