SHILLONG: Re·baenggipa April ba May jani gisepo ong·atna sienggipa Lok Sabha election-na Meghalaya a·doko bang·bata political dolrangan an·tangtangni candidate-rangko paraktokmanahaoba, Bharatiya Janata Party (BJP)-de Shillong aro Tura Lok Sabha constituency-rango susaatna gita manderangni ra·chakna man·gnigipa candidate-rangko sandiskakuenga.
Bristibar salo, BJP-ni Meghalaya in-charge M Chuba Ao-ni parakatani gitade, Shillong aro Tura Lok Sabha constituency-rango badia candidate-rangko manderang namnikbattokgen, uko name nichengengkua.
Shillong parliamentary constituency-oni susana gita komibeoba sakgni candidate-rang aro Tura parliamentary constituency-oni susana gita komibeoba sakgittam ba sakbri candidate-rang BJP-ni tikitna nisengengachim.
Lok Sabha election-ni tarikrangko Election Commission parakatani ja·mansa Meghalaya a·doko BJP-ni campaign ka·aniko a·bachengatgen ine u·iatengon, batanggimin chang election-rango a·dokni manderang, regional party ba joltangni political dolrangkosa mikpakma niahaoba ia changode manderang, Prime Minister Narendra Modi-nan pu·ontokna nangnikbattokenga ine Ao parakataha.
Da·o dipet Lok Sabha election-na Meghalaya a·doko TMC aro BJP dolrang, an·tangtangni candidate-rangko paraktokkujaengoba, NPP, Congress, VPP aro UDP-HSPDP dolrangde an·tangtangni candidate-rangko paraktokmanskaahachim.
