MENDIPATHAR: Re·anggipa Bristibar saloni a·bachenge, North Garo Hills a·jani District Commerce & Industries Centre (DCIC), District Industrial Exhibition-ko salgnina Mendipathar-ni Babupara-o donggipa Industrial Estate-o ong·atangaha aro ia exhibition-o dingtang dingtang biaprangoni bading chiwalgiparang aro dingtang dingtang dolrang bakko ra·angtokaha.
Ia exhibition-o gimik dam 30 stall-rangko donataha, jeon North Garo Hills a·jani self help group (SHG) aro uandakgipa dolrang bakko ra·enba, jaktangchi tarigimin cha·anirang, sol·a repanirang, wata chenganirang, sika koanirang aro uandakgipa ma·manti bosturangko mesokna aro palna sim·na gita cholrangko man·tokaha.
Ia salgnina ong·atanggipa Industrial Exhibition-o sol·a repani, cha·ani tariani aro ma·manti bosturangko tariani bidingoba dake mesokangtokaha.
North Garo Hills DCIC-ni Functional Manager NR Marak-ni parakatani gitade, Mendima songo wa·aoniko ma·manti bosturangko tarina gita skie on·enga aro iano skie ra·enba, songni me·chikrang, ma·manti gandingrangko wa·aoniko tarie, ia exhibition-o mesokna aro palna sim·na gita cholrangko man·tokaha.