Salgnina ong·atenggipa Int’l Water Conclave-ko a·bachengata
SHILLONG: Salgnina Shillong songjinmao ong·atenggipa International Water Conclave-ko Sukrobar salo, a·dokni Chief Minister Conrad K Sangma a·bachengate on·angaha aro ia conclave ba tom·bimonganiko a·bachengatanio a·dokni Water Resource Minister Comingone Ymbon, Health Minister Ampareen Lyngdoh, Fisheries Minister A.L. Hek, India sorkarini ning·o donggipa Jal Shakti Ministry-ni Secretary Secretary Debashree Mukherjee aro dingtang dingtang dilgiparangba bak ra·angtokaha.
Ia salgnina ong·atenggipa International Water Conclave-o Thailand, Nepal, Bhutan, Myanma, Cambodia aro Vietnam a·songni delegate-rangba re·bae bakko ra·enga.
Ia tom·anio, a·dokni Chief Minister, jinmana aganprakengon, samtangtango ong·telaigiparangko ripinge rakkina kam ka·anio, gipin a·dokrang aro a·songrang baksaba bakrime kamko ka·na nangenga ine parakataha.
“Chiring chibisik aro samtangtango ong·telaigiparangko rakkianio gipin a·dok aro a·songrang baksa bakrime kamrangko ka·jagenchimode kamrangko ka·anio an·ching maming dakeba chu·sokgipa ong·na man·jawa aro samtangtango ong·telaigiparangko ripinganio gipin a·dok aro a·songrang baksa agangrikanirangba dongna nangenga,” ine ua aganaha.
Dingtang dingtang a·dokrang, district-rang aro gadangrango climate council-rangni dakna nanggni kamrangni gimin janapatengon, a·gilsakni ding·a aro sin·a batroroengani a·selan chirangko man·anio neng·nikanirangko chagrongna nangengani gimin dingtang dingtang dolrangni agangrike apsan kam ka·aniko nangchongmotenga ine Chief Minister aganaha.
Ia International Water Conclave-ni bidingo talataniko on·angskaengon, ia tom·bimonganiko ong·ataniara scheme-rangko chu·sokatani ba nisanrangko chu·sokatani giminsan ong·aigija sorkarini dingtang dingtang department-rangko aro dingtang dingtang dolni membor-rangko apsan biapona rimbae, neng·nikanirangko chel·atna chanchirimna miksonganian ong·enga ine Chief Minister parakataha.
Water Policy-ni bidingo talataniko on·angskaengon, India a·songo Water Policy-ko ra·gate kam ka·enggipa mitam a·dokrangoni Meghalaya a·dokba damsa ong·enga aro ian a·doko donggipa chiring chibisik, chimarang, pokkrirang aro uandakgipa cholrangko tange rakkina miksongani ong·enga ine Chief Minister parakataha.
“Chio nangchakegipa u·iatanirangko chimongna gita bakan a·doko Data Innovation Center-ko kulignok aro a·dok gimiko dam 600 Small Multipurpose Reservoir-rangko rikanio sorkarina Asian Development Bank dakchakanirangko on·enga,” ine Chief Minister aganaha.
Ia International Water Conclave-ni bak gita dingtang dingtang susaanirangko chegiparangnaba ia tom·anio certificate aro boksisrangko on·angaha.
