SHILLONG: Kangal cholgrirangna ma·mong sorkarini ra·gate on·enggipa dingtang dingtang scheme-rangko diltugipa songadam nokadamrango donggipa manderang man·tokjaenga ine BJP, NPP-ko matnangataha.
“Songadam nokadamrango donggipa manderang pilak namgnirangko man·china gitasa BJP-chi dilenggipa ma·mong sorkari, dingtang dingtang scheme-rangko ra·gate on·ahachim indiba MDA sorkariko dilenggipa NPP, ia scheme-rangko nirok sandina gisiko nangjaengani a·sel ia scheme-rang, BPL nokdangrangona sokangjaenga,” ine Tura-ni MDC aro BJP Meghalaya-ni state vice president Bernard N Marak parakataha.
Maini gimin manderang, BJP-ko seokgen ine sing·anina aganchakaniko on·angskaengon, “Sawa namgnirangko on·enga, ia pilakkon manderang ma·sitoka. Modi sorkarini on·enggipa merong, Saubhagya-ni ning·o on·enggipa bijoli, PMAY-ni ning·o on·enggipa nokrang, PMGSY ramarang, Ujjwala-ni ning·o indin on·enggipa LPG, BJP sorkarini on·enggipa sanna banani cholrang, ia pilakkon manderang ma·sitokaha,” ine Marak aganaha.
Meghalaya a·dokni diltubatsranggipa songrangode manderang ia pilak namgnirangko man·tokjaenga ine matnangatengon, “Ia sal somoirango chinga dingtang dingtang songrangona wenenga aro anga A·chikrangni songdongchakenggipa a·bri jolrangona wenenga. Ia pilak biaprangon manderang, BJP-ko ra·chaktokaha,” ine Marak parakataha.
Kangal cholgrirangni janggi tanganiko namdapatanian BJP sorkarini nangnikani ong·a ine janapatengon, Prime Minister Narendra Modi-ni ra·gate on·enggipa scheme-rangchi kangal cholgrirangna pilak nanganirangko on·na jotton ka·enga ine BJP-ni state vice president aganaha.
Ia election-o manderang, BJP-kon seokgen ine janapatskaengon, “Dingtang dingtang songrango bang·bea manderang BJP-o napna sienga aro BJP dolara onbatsranggipa gadangni dolan ong·ani gimin da·o bang·bata manderangan BJP-o bakrimna re·batokengaha. Chinga a·dokni diltubatsranggipa songrangonan sokangengaha,” ine Marak aganaha.
Lok Sabha election-o susana sienggipa BJP candidate-rangko parakani bidingo sing·on, “Candidate-rangko seokanide chingni dilgiparangni jakosa maina chingade kamrangko ka·e on·giparangsan ong·aia. Dilgiparangni seokaniko chinga sengkuenga aro haida ia jani gisepon ba mikkang jani skanggipa bakon chingni dilgiparang, candidate-rangko paraknaba dongaha. Indiba chinga kamrangko ka·soengaha,” ine Tura-ni BJP MDC parakataha.
