SHILLONG: Meghalaya aro Assam sorkarirangni skanggipa bako, meligrikna man·jaenggipa damdok biaprangko sualgrikna soi ka·grikgipa Memorandum of Understanding-ko Voice of the People’s Party (VPP) ra·chakna man·jawa ine parakattaiaha.
“MDA sorkarini Assam sorkari baksa soi ka·grikgipa MoU-ko chinga ra·chakna man·jawa. Meghalaya a·dokni a·arangko Assam-na on·aniko chinga ra·chakna man·jawa. Assam a·doksa Meghalaya a·doko napdraaha ine chinga a·bachengonin aganahani gimin Meghalaya a·dokni a·arangko Assam-na on·anikode chinga ra·chakna man·jawa,” ine VPP-ni spokesperson Batskhem Myrboh, kobor ra·timgiparangna aganaha.
Assam a·dokni a·a jakpasakoba Meghalaya a·dokna on·anichi, Assam-ni manderangko gisik saatna man·jawa ine adita salrangna skang Assam a·dokni minister Atul Borah-ni Assam Assembly-o agangipa kattarangni gimin janapatengon, “Assam Minister-ni agangipa kattarangara nangeanin dongja aro chinga a·dok damgnini gisepo soi ka·grikgipa MoU-ko nipilchina dabienga,” ine Myrboh parakataha.
Ru·utbea bilsirangna Assam aro Meghalaya a·dokni simarango ong·enggipa golmalrangko namatna gita Assam aro Meghalaya sorkarirang, re·anggipa bilsionin apsan agangrike, ia agangrikani skanggipa bakkode matchotatna man·pilahachim aro uandaken da·o gnigipa agangrikanikoba dakengahachim ine nikna man·a.
Assam aro Meghalaya a·dokni simarango meligrikna man·jaenggipa gimik dam 12 biaprang donga aro ianoni damdok biaprangkode namatna gita 2022 bilsini March jaon a·dok damgnini dilgiparang, New Delhi-o Union Home Minister Amit Shah-ni mikkango soi ka·grikahachim.
A·dok damgnini gisepo meligrikna man·jaenggipa damdok biapni 36.79 square kilometre-oni 18.46 sq km-ko Assam aro 18.33 sq km-ko Meghalaya a·dok man·skaahachim.
Uandaken da·o bangki dongkuenggipa damdok biaprangoba a·dok damgnini gisepo tom·tomaniko ra·bana gita a·dok damgnini sorkarirang agangriktaiengahachim.