TMC, Lok Sabha poll-o candidate sakgniko susaatgen.

SHILLONG: Adita jarangna jripmittip dongani ja·mano bon·kamao Trinamool Congress, re·baenggipa Lok Sabha election-o Shillong aro Tura Lok Sabha seat ge·gnion uamangni candidate-rangko susaatna gita tarienga.
Party koboro paraka je mingsa parliamentary party tom·aniko New Delhi-o ong·ataha, uni ja·mano TMC-ni dal·batgipa dilgiparang Garo Hills-ona wenbaaha.
TMC-ni dal·dalbatgipa dilgiparang Garo Hills-ni bang·a party dilgiparang baksa agangrikaha aro re·baenggipa LS election-o party-ni gita sawa susana sikengachim uarangkoba sandiaha.
Indake ong·engon, re·baenggipa LS election sakomancha susaatgenchim a·dokni party dilgiparang namedake tik ka·china gitaba party central leadership agan-ku·pattiangaha.
Party koboro parakatani gita, party-ni MDC-rangba mitamde election-o Tura seat-na susana gita jechaktokaha, iani a·sel haida gitcham MLA aro Minister Zenith Sangma Tura Parliamentary seat-o susanaba donga.
Unomitingo Shillong seat-o susaatna gita manderangko niatengon, TMC uamangni ku·rang on·kalgipa dilgipa George Lyngdoh-kon election-o susaatainaba donga, indiba Shillong seat-na susagenma susajawa tik ong·kuja.