SHILLONG: South Garo Hills a·jani simarang gita chinirangko Bangladesh a·songona badingsrukangenga ine dingtang dingtang dolrang parakatani ja·man da·o Khasi Hills gitaba chini aro ma·manti cha·ani bosturangko Bangladesh a·songona badingsrukangenga ine Pynursla-ni Hynniewtrep Achik National Movement (HANM) Ri-War Mihngi circle parakataha.
HANM Ri-War Mihngi circle-ni parakatani gitade, chini, rasin, alu, na·kam, matchu aro matmarang baksana ma·manti bosturangkoba Pynursla-Dawki rama gita Bangladesh a·songona badingsrukangrongengachim.
Pynursla-Dawki rama gita chini aro ma·manti bosturangko Bangladesh a·songona niam gri badingsrukangenga ine matnangatengon, ia rama gita Bangladesh a·songona badingsrukaniko bilakbate nirok sandichina HANM Ri-War Mihngi circle, Pynursla Civil Sub-Division-ni Sub-Divisional Officer (SDO)-ko didiataha.
Iani bidingo HANM-ni dilgiparang Budbar salo, Pynursla Sub-Division-ni SDO-na memorandum-ko on·angaha aro ia rama gita Bangladesh a·songona niam gri badingsrukaniko champengatjagenchimode an·tangtangan iako jako ra·na draatako man·gen ine mikrakataniko on·angaha.
Ma·manti cha·ani bosturangko Bangladesh a·songona badingsrukangengani a·sel a·dokon cha·ani bosturang chu·ongjaengaha ine janapatengon, cha·ani bosturang chu·ongjae damrangba rakbatengaha ine HANM Ri-War Mihngi circle-ni president parakataha.
South Garo Hills a·jani Bangladesh simao donggipa Rongtotma songo, niam gri chini salangenggipa adita bol truck garirangko nikani ja·man, National Highway (NH-62) rama gita Bangladesh a·songona niam gri chini badingsrukatenganiko sandirokchina Rongjeng-ni A·chik Organisation for Social Welfare (AOSW) dabiangahachim.
Jagittam skangsan dolsa NGO-ba, Assam-oni chini salbaenggipa truck garirangko Nongalbibra-o champengsoahachim aro ia garirang, maming lekka grisa ia chinirangko Baghmara aro Rongara jolrangona salangenga ine parakatahachim.