SHILLONG: Re·anggipa Mongolbar salo, Ri Bhoi a·jani Umran Dairy samba jolo donggipa buringoniko buringo man·gipa me·su samjakrangko sandiengmiting somoio bilsi 52 ong·gipa me·chikma saksa bijoli sala man·e siangna nangaha.
Koborko on·ani gitade, ua somoio bijoli sala man·e sianggipa Edwina Lyngdoh Lyngkhoi, an·tangni demechikgipa baksa pangna dakronga gitan buringoniko me·su samjak sandina re·angahachim indiba rasong grie ua, a·ao ga·ake dongenggipa bijoli silitingko ga·dapmanaha aro bijoli sala man·e ua biapon siaha.
Ia a·sel ong·ani somoio, uni demechikgipa adita chel·kala biapo me·su sandiskaengachim indiba uni chrikako knae ua biapona rikbaon, ma·gipani a·ao ga·ake dongakosa nikeaiaha.
Ma·gipani a·ao ga·ake dongako nike, demechikgipa chrik a·boke songni manderangko okamon ja·mano songni manderang bakan police-rang baksa ua biapona sokangaha.
Ja·mano ia me·chikmani manggisiko Civil Hospital-ona ra·angaha.
Indake ong·engon, mikkangchi iandakgipa a·selrang ong·taijana gita bijoli silitingrangko name nirokchina aro bol cheksirangko den·e galchina gita songni Nokma, official-rangko didiataha.
