TURA: Bangladesh a·songona niam gri gue aro ma·manti bosturangko badingsrukanio, silchidare aro pekatgipa samrangkoba badingsrukani cholrang dongengani gimin ian a·songna kenchakna nanganiba ong·enga ine Bristibar salo, a·dokni gitcham Chief Minister aro All India Trinamool Congress (AITC) Meghalaya-ni dilgipa Mukul Sangma parakataha.
Mendipathar-ona re·angani somoio kobor ra·timgipa manderang baksa agangrikengon, gue aro ma·manti bosturangko Bangladesh a·songona badingsrukaniara game ge·e cha·enggiparangnasan ong·aigija a·song gimiknan kenchakna nangani ong·enga ine Sangma parakataha.
“Meghalaya a·dokni international border-o mai obostarang ong·enga, chingna changni chang koborrangko on·engaha. Iandake gue aro gipin bosturangko badingsrukanio, silchidarerangkoba aro pekatgipa samrangkoba badingsrukanirang chol donga. Iandake badingsrukanio silchidarerangko aro pekatgipa samrangko a·songona ra·napbaa dongja ine sawa aganna man·gen?” ine Sangma sing·doataha.
Ian a·song gimiknan kenchakna nangenggipa obosta ong·engani gimin ua iani bidingo ma·mong sorkarina u·iatgen ineba AITC-ni dilgipa aganaha.
“International border-o badingsrukaniode pangnan gipin bosturangkoba man·chaprongaia aro iandakgipa bosturangnan an·ching mikrakna gita nangenga. Ma·manti bosturang baksana silchidarerangko aro pekatgipa samrangkoba an·chingni a·songona ra·napbana man·aia. Uni gimin koborrangko man·soani kri ma·mong sorkari ja·kurangko de·na nangchongmota,” ine Sangma aganaha.
Gipin a·songrangona badingsrukatengani a·sel gueni damrang tang·onange game ge·e cha·enggipa manderangni chagrongna nangenggipa neng·nikani bidingo janapatskaengon, gueni damrang tang·onangako knasoe ua an·tangba bebera·nan man·piljaha ine Sangma aganaha.
“Anga an·tangba gue bagan dake bading chiwale cha·paenggipa ong·a aro gueni damrangko anga angni manager-o sing·sandion gueni damrang tang·onangako knasoe namen aiao inmanbeaha. Badita jarangni gisepon gueni dam rang·san tang·onangaha aro ian game ge·e cha·enggipa manderangna namen dukni katta ong·chongmota,” ine Sangma aganaha.