SHILLONG: Ia bilsio ong·atna sienggipa Lok Sabha election-o Shillong Bar Association-ni Advocate Peter Shylla-ba Shillong Parliamentary constituency-o Independent candidate ong·e susana parakatahani gimin Shillong Lok Sabha seat-na susana sienggipa candidate-rang da·o gimik sakdok gapengaha.
Peter Shylla baksana Shillong Parliamentary constituency-o susana sienggipa candidate-ranga, Shillong-ni Lok Sabha MP aro Congress candidate Vincent H Pala, a·dokni Cabinet Minister aro National People’s Party (NPP)-ni candidate Ampareen Lyngdoh, Voice of the People’s Party (VPP)-ni candidate AJ Syngkon, United Democratic Party (UDP) aro Hill State People’s Democratic Party (HSPDP)-ni nangrime bikotgipa Regional Democratic Alliance (RDA)-ni candidate Robertjune Kharjahrin aro sakgipin Independent candidate Lakhon Kma ong·engachim.
Shillong Lok Sabha constituency-o Independent candidate ong·e susana sienggipa Peter Shylla-ra Shillong songjinmani Laitkor jolo songdongenggipa ukil ong·a aro uaba Meghalaya a·doko songdongenggipa manderangni neng·nikanirangko namatna miksonge ia election-o susaenga ine parakataha.
