SHILLONG: Meghalaya Legislative Assembly-o a·dokni dingtang dingtang nanganirangna apsan ku·rang on·na ku·monganiko Trinamool Congress (TMC) aro Voice of the People’s Party (VPP)-ba namnike ra·chaktokahani gimin da·o dolgittam opposition dolrangni gisepo bakrimani cholrangba donga ine Leader of Opposition (LO) ba Opposition dolni dilgipa aro Congress Legislature Party (CLP)-ni dilgipa Ronnie V Lyngdoh, an·tangni ka·dongchakenganiko parakataha.
“Chinga da·o a·dokni dingtang dingtang nanganirangna apsan ku·rang on·na ku·mongahani gimin batanggimin changona bate ia chango nangrimaniba bataha. Ian nambegipa chin ong·a aro chingni gisepo nangrime kam ka·anirang chu·sokgenchimode haida chinga dolgittamni gisepo bakrimani cholrangba donga,” ine Lyngdoh aganaha.
Batanggimin chang Assembly session-rangode Opposition dolrangni gisepo nangrime ku·rang on·anirang dongjani a·selo opposition dolrangni gisepon ding·chaogrikanirang ong·kate, maming kamrangkon name ka·na man·ja gita ong·ahachim.
Opposition dolrangni tom·aniko ong·atanio VPP-ni MLA-rangde ra·bae TMC-ni MLA-rangde sokbajahani gimin sing·on, “Ua somoirango TMC-ni bang·bata MLA-rangan Garo Hills-osachim aro TMC Meghalaya-ni state president Charles Pyngrope-ba gipin biaposachim. Iani bidingo uamang angna u·iataha aro chingni gisepo ma·sigrikaniba donga. Ia tom·aniona VPP-ni dilgiparang re·baaha aro chinga apsan asonge, Assembly-o ku·cholsan ong·na tik ka·aha,” ine Opposition dolni dilgipa parakataha.
