SHILLONG: Meghalaya a·doko an·cheng aro ro·ong bikotanikoba sorkari, koela bikotani baksa apsan dake chanani a·sel a·doko an·cheng aro ro·ong bikote cha·paenggipa manderangsa neng·nikanirangko chagrongna nangtokengaha ine Mongolbar salo, Opposition VPP-ni MLA Ardent Miller Basaiawmoit parakatenba, an·cheng aro ro·ong bikotgiparangnaba dingtang niamko tariskachina a·dok sorkariko didiataha.
A·doko an·cheng aro ro·ong bikotanikoba champengatengani a·sel an·cheng aro ro·ong bikote cha·enggipa manderangni neng·nikanirangko janapatengon, a·doko an·cheng aro ro·ong bikote cha·anian hajalni hajal manderangna janggi tangani chol ong·paengachim aro da·o uamangni kamrangko Forest department champengatengani a·sel uamang janggi tanganio neng·nikanirangko chagrongna nangtokengaha ine Basaiawmoit parakataha.
“An·cheng aro ro·ong bikote cha·aniara bang·a manderangnin janggi tangani chol ong·a ine an·ching pilakan ma·sia aro an·cheng aro ro·ong bikotenggipa biaprangara game ge·e cha·na man·gipa biaprangba ong·ja. An·cheng aro ro·ongrangko bikote cha·enggipa manderang, chengo ma·gitcham pagitchamrangni daka rikanio pangchakesa an·cheng aro ro·ongrangko bikota aro uamang an·tangtango je on·tisa dongpagipa a·arangosa iarangko dake cha·paengachim,” ine Basaiawmoit aganaha.
An·cheng aro ro·ong bikote cha·aniko champenganiara ia kamrango pangchake janggi tangenggipa manderangni janggi tangani cholrangkon bon·atani gitasa ong·enga ine janapatskaengon, “Anga an·tangba Meghalaya Mines & Minerals Concession Rules 2016-ko poraie niaha aro an·chingni manderangko ia niamrang gita janggi tangatna nanggenchimode uamang ia niamrangko ja·rikna man·jae, an·tangtangni janggi tangani cholrangko watgalna nangao ga·akaigen,” ine VPP-ni president aganaha.
