2024-25 bilsina gong kr 2029-ni deficit budget-ko CM Assembly-o parakata

SHILLONG: 2024-2025 bilsina Gross State Domestic Product (GSDP)-ni 3.83 percent ong·gipa gimik gong kror 2029-ni deficit budget-ko Budbar salo, a·dokni Chief Minister Conrad K Sangma, Assembly-ni budget session-o parakataha.
Chief Minister-ni parakatani gitade, chu·gimik receipt-rangara gong kror 27,072 ong·enga aro ianoni gong kror 23,515-de revenue receipt aro gong kror 3557-de capital receipt ong·enga.
Gro donggipa gong kror 3527-ko changale total receipt-ko gong kror 23,545-na hisapaha ine talataniko on·angengon, total expenditure-na gong kror 27,072-ko hisapenga aro ianoni gong kror 19,653-kode revenue expenditure-na aro gong kror 7,419-kode capital expenditure-na hisapenga ine Chief Minister parakataha.
Chief Minister-ni aganani gitade, kror 1498-ni loan payment-ko changale total expenditure-na gong kror 25,574-ko hisapenga.
2024-25 bilsio interest payment-na gong kror 1,236-ko aro pension payment-na gong kror 1,865-ko hisapenga ineba ua aganaha.
Ia bilsini budget-ko a·dokni Chief Minister, Meghalaya a·dokko US dollar billion 10 economy ong·atna tarisamsoanio ‘Mission 10’ ine gisik ra·china gitaba Assembly-ni membor-rangko aro a·doko songdongenggipa mande sakantikon didiatataha.
2032 bilsini gisepo Meghalaya a·dokko a·songo nambatsranggipa dam 10 a·dokrangoni damsa ong·atna gita miksonge sorkari kamko ka·enga ineba ua aganaha.
“Ia miksonganiko chu·sokatna angni sorkari pilak cholrangchin jotton ka·gen. 2028 bilsini gisepo a·dokni GDP-ko US dollar billion 10-ona bariate Meghalaya a·dokba ‘Viksit Bharat’-ni niksamsoanina on·gilpagen aro iakon anga re·anggipa bilsio Prime Minister Narendra Modi-na ku·rachakaha aro da·aloba anga Assembly-o iako agantaienga,” ine Sangma aganaha.
Ia budget-o gender budget aro youth budget-ko ra·baenga ine talataniko on·angengon, gender budget-na gong kror 5271-ko aro youth budget-na gong kror 2853-ko sorkari chamenga ine Chief Minister parakataha.
Meghalaya a·doko lekka porako tang·doatna gita sorkari, gong kror 1,335-ni grants aro aid salary-rangko man·chape gong crore 3,539-ko Education department-na chamenga ineba Chief Minister parakataha.
Ia 2024-25 bilsini gisepo an·seng baljokani kamrangna gong crore 1,970-ko, rama aro nokrangko rikani kamrangna gong crore 2,709-ko, bijolina gong crore 1558-ko, primary sector-na gong crore 1670-ko, urban sector-na gong crore 934-ko aro ringani chirangna gong crore 905-ko sorkari chamenga ineba Chief Minister aganaha.