Assamo Kristianrangko chadrapanina ta·raken kam ka·china UDP didia

SHILLONG: Assam-o Kristianrangko kal·ake roanirangko aroba batanggimin somoio Assamni Goalpara district bus gario songreangmitingo saksa nun-ko kal·steke roanirangko United Democratic Party (UDP), raken jegalataha, Kristianrangni kosako indakgipa kamrangko ka·anirang a·bachengbaengaon indakgipa kamrangko raken champengsona nanga ong·jaode toromrangni gisepo nanggrikanirangona sokbanaba donga ine UDP, kenchaksoanirangko parakaha.
“Assamo Kristianrangko kal·ake roanirangko aro saksa toromo dangdike on·gipa nun-ko kal·steke roanirangko chinga raken jegala, indakgipa mitchigrikatani aroba kajia ong·ataniona ra·baenggipa manderangko watna nangja aro uamangko rim·enba sasti on·na nanga,” UDP General Secretary Jemino Mawthoh aganaha.
Kristianrangni kosako ba je torom ma·malni kosakoba ong·chong, kal·stape ba kal·steke roanirang kenchaksona ba jajrengsona nanggipa kam ong·a ine aganengon, “Da·o chasongo, chong·mongtan mande jatni seng·ani chasongo indakgipa denggu dolrang mande jatni gisepo mitchigrikataniko ra·baenga” ineba ua aganaha.
Minggipinara “Political aro toromni dilgiparangni gisepo dingtanggrikanichi obostarangko, ching·enggipa wa·alo kerosin rudapa gitasa dakatenga,” ua agandapaha.
Jedakgipa bebera·aniba ong·chong toromni jakgitelaniko chel·chakna dal·begipa kam ong·a, unigimin pilak torom ma·malna jakgitelaniko on·na nanga, Mawthoh aganaha.
“Iandakgipa denggu dolrangko a·bachengon bon·atna nanga aro niamko ja·rikna nanga. Indakgiparangko bon·atjaode, torom ma·malrangni gisepo nanggrikaniona sokbana kenchakani donga,” ua agandapaha.
Assamo Kristianrangko chadrapani bidingo Assembly-oba opposition dolrang jegale aganaha aro iarangni bidingo bakbakan Assam Sorkari baksa agangrike kamrangko ka·china gita Meghalaya sorkariko didiaha.
Unagre Meghalaya-ni dingtang dingtang dolrangba Assam-o Kristianrangni kosako daka kamrangko raken jegalattokahachim.