TURA: Bangladesh a·song gita Burma-ni gue granrangko niam gri badingsrukbaengani a·sel Garo Hills-o gue bagan dake cha·enggiparang noksan ong·na nangtokengani gimin niam gri gue badingsrukaniko champengchina dabie, North Garo Hills a·jao gue bagan dake cha·enggipa manderang, a·dokni Chief Minister Conrad Sangma-na sedoataha.
Iani bidingo North Garo Hills a·jao gue bagan dake cha·enggipa manderang, Sombar salo North Garo Hills a·jani Deputy Commissioner-ko grongenba, uamangni CM-na sedoatgipa chittiko on·ataha.
Chief Minister-na badi ka·e sedoatgipa chittio gue bagan dake cha·enggipa manderangni parakatani gitade, pangna bilsian February jao guerangko bang·bate palna man·ani gimin uamang an·tangtangni guerangko palna gita Assam-ni gue badinggiparangko senge dongtokengachim indiba February jao gue badinggiparang uamangona re·bajahani gimin uamang am·sandion, Burma a·songni gue granrangko dam komibate man·engani giminsa darangan Garo Hills-ni guerangko bretokjaenga ine gue bagan dake cha·enggiparang ma·sina man·aha.
“Assam-o gue badinggiparangna anga phone ka·e sing·sandiaton, uamang chingni guerangko dam rakdugaani gimin brena man·jawa ine aganchakataha. Burma a·songni gue granrangko, Bangladesh a·song gita Meghalaya a·dokni dingtang dingtang ramarang gita ra·bae, ia gue granrangko kg-prako gong 260 ka·e palenga indiba chingni korosrangko hisape iandake dam nom·dugaede palna man·skaja,” ine Bajengdoba-o gue bagan dake cha·enggipa Panseng B Marak parakataha.
North Garo Hills a·jao gue bagan dake cha·enggipa manderangni parakatani gitade, batanggimin bilsirango uamang gue bag-prakon gong 6500-mang ka·e palna man·achim indiba ia bilsiode gueko bag-prako gong 4000-na bate palna man·tokskajaengahachim.
“Burma a·songni gue granrangko niam gri ra·baengani a·sel Dadenggre, Jengjal, Siju, Baghmara, Rongara, Bajengdoba, Kharkutta, Rongjeng, Songsaka aro uandakgipa pilak biaprangon noksan ong·na nangtokengaha. Uni gimin gue bagan dake cha·enggipa nokdangrangni namgnina iandake niam gri gue badingsrukaniko champengchina chinga nangnikenga,” ine gue bagan dake cha·enggipa sakgipin Rakman Marak parakatskaaha.
