SHILLONG: Meghalaya a·doko skul fee-rangko rakdugae ra·engani a·sel dedrangko skulrangchi watpaenggipa ma·a paarang neng·nikanirangko chagrongna nangengoba a·dokni Education department, maming ku·rangko on·jaenga ine Sombar salo Voice of the People’s Party (VPP) matnangataha.
Assembly-ni budget session-o ia bilsina Education department-ni skulrangna tarigimin niamrangni gimin chanchirimna ra·baengon, private skulrango nangana bate fee-rangko rakdugae ra·engani a·sel ma·a paarang neng·nikanirangko chagrongna nangtokenga ine North Shillong-ni VPP MLA Adelbert Nongrum, suk ong·gijaniko parakataha.
Nongrum-ni parakatani gitade, private skulrango jaanti gamna nanggipa fee-rang rakdugaan baksana bilsini a·bachengao gamna nanggipa annual fee-ba jaanti ra·gipa fee-na changdokmang batani a·sel dedrangko skulrangchi watenggipa ma·a paarang namen sko sana nangtokengachim.
“Ia skul fee-rangko rakdugae ra·engani gimin skulko chalaienggiparang talatanikoba on·na man·ja aro bilsio iandake annual fee-rangko ra·enggipa bang·bata private skulrangan sorkarini gita tangka paisarangchi dakchakanirangkoba man·skaengachim,” ine Nongrum aganaha.
Private skulrango iandake skul fee-rangko rakdugae ra·engoba maming ku·rangko on·jaengani gimin Education department-ko sing·doatengon, sorkarini dakchakanirangko man·eba annual fee-rangko rakdugae ra·enggipa private skulrangna maini gimin Education department, niamrangko donna man·jaenga ine VPP MLA sing·doataha.
RTE Act-ni ning·o ga·akgipa skulrangni gimin RTE Act-ni Section 2 Clause (n)-on talate janapahani gimin skul fee-rangko tarianiara Education department-ni nirok sandianian ong·na nangachim ineba Nongrum aganaha.
India a·songni mitam a·dokrangode skul fee-rangko tik ka·na gita dingtangmancha committee-rang donga ine janapatengon, skul fee-rangko tik ka·e on·na gita maini gimin Meghalaya a·doko man·skajaenga ine VPP MLA sing·doataha.
Nongrum-ni parakatani gitade, private skulrango dingtang dingtang gamna nanganirang, jekai Development fee, Sports fee, Library fee, Laboratory fee, Computer fee, Transportation fee, Activity fee, Miscellaneous fee aro uandakgipa fee-rangkoba ra·engani a·sel ma·a paarang neng·nikanirangko chagrongna nangtokenga.
Uni sing·anirangna aganchakaniko on·angskaengon, dingtang dingtang skulrang, mongsongbate Government aided aro government grant skulrango fee ra·aniko Education department nianggen ine a·dokni Education Minister Rakkam A Sangma ku·rachakaniko on·angaha.
Skul fee-rang rakdugaengani giminan mitam ma·a paarang aro chatro chatrirangba unona re·bae agangrikeaha ineba Sangma aganaha.
“Iani bidingo chinga am·sandina a·bachengataha aro Meghalaya State Education Commission-ba iani bidingo am·sandienga,” ine ua aganaha.