TURA: North Garo Hills a·jani Gambil Deficit UP skul aro Gambil Union Secondary skulo namgipa toilet-rang dongjae, poraienggipa chatro chatrirang aro skigiparang neng·nikanirangko chagrongna nangtokenga ine Dainadubi-ni dingtang dingtang dolrang, jekai AYWO, AHAM, FAF, AAYWS, GSU, Public Joint Action Committee, GSMC aro uandakgipa dolrang parakatenba, ia skulrangna namgipa toilet-rangko rike on·china North Garo Hills a·jani Deputy Commissioner-na sedoataha.
NGO-rangni u·iatani gitade, Gambil Deficit UP skulko 1975 bilsion kuliahachim aro ia skulna secondary section-koba 2019 bilsio Gambil A·ga songni manderang kuliahachim. Indake ong·genchimoba, ia skulo name rikgipa toilet-rang dongjani a·selo poraienggipa chatro chatrirang, skigiparang aro gipin kam ka·giparangba neng·nikanirangko chagrongna nangtokenga ine Dainadubi jolni NGO-rang parakataha.
“Ia skulo skigiparang an·tangtangan toilet-rangko rikna gita jotton ka·tokengachim indiba cholrang dongjae, toilet-rangko rikanio neng·nikanirangko chagrongna nangtokenga. Uni gimin skulo poraienggipa chatro chatri aro skigiparangni namgnina ia skulna toilet-rangko rike on·pachina chinga mol·molenga,” ine Dainadubi-ni NGO-rang, North Garo Hills a·jani Deputy Commissioner-na sedoatgipa chittio janapataha.
