TURA: Meghalaya a·dokni Job Reservation Policy-o Scheduled Tribe (ST)-rangna 80 percent biaprangko kanggopna miksongenganiko A·chik Conscious Holistically Integrated Krima (ACHIK) dolba raken jegalataha.
Meghalaya a·dokni Job Reservation Policy-o Khasi-Jaintia aro Garorangna 80 percent-ko kanggopchina gita adita salrangna skangsan, Assembly-ni budget session-o Mawkyrwat-ni MLA Renikton L Tongkhar aganahachim ine nikna man·a.
Meghalaya a·dokni Job Reservation Policy-o ST-rangna 80 percent kanggopaniko jegalatengon, a·doko songdongenggipa Khasi, Jaintia aro Garorangna 80 percent seat-rangko kanggopanichi ja·mano ia jatgittamni gisepon meligrikgijanirang ong·katan baksana kamna ra·anio badiaba jatkode nichanggalani aro bak rengsi tikatgijaniona sokskanaba gnang ine ACHIK-ni president Thomas M Marak parakataha.
“1972 bilsio Meghalaya a·dokko man·chengani somoion, a·dokko man·e on·dilanggipa pagitchamrang, ia jatgittamni gisepo darangkoba onchepani ba mikkang niteani gri apsan bak rengsiko man·pachina gita Khasi-Jaintirangna 40 percent aro Garorangna 40 percent-ko kange donangaha aro ia apsan niamkon da·o mikkangchiba ja·rikangkuna nanga,” ine Marak parakataha.
Iani bidingo South West Garo Hills ACHIK-ni co-chairman Brejio M Marak-ba ku·rang on·atengon, “An·chingo chol man·pagijagipa jatrangna cholrangko on·na nanga indiba iandake ST gimikna 80 percent-ko kanggopanichide batesa a·dokni namroro silroroaniko champengani gita ong·gen,” ine parakataha.